కంకషన్ సబ్స్టిట్యూట్ విషయంలో మాజీలు వీరేందర్ సెహ్వాగ్, సంజయ్ మంజ్రేకర్ తలో విధంగా మాట్లాడుతున్నారు. టీమ్ఇండియా అవకాశాన్ని సరిగ్గా సద్వినియోగం చేసుకుందని వీరూ చెప్పాడు. కంకషన్ ఉపయోగించుకునే విషయంలో కోహ్లీసేన ఓ నిబంధనను అతిక్రమించిందంటూ సంజయ్ తెలిపాడు.
ఆస్ట్రేలియాతో శుక్రవారం జరిగిన తొలి టీ20లో భారత 11 పరుగుల తేడాతో విజయం సాధించింది. జడేజాకు కంకషన్ సబ్స్టిట్యూట్గా వచ్చిన చాహల్.. మూడు వికెట్లు తీసి గెలుపునకు కారణమయ్యాడు.
కంకషన్ విషయంలో భారత్ నిర్ణయమే కరెక్ట్: సెహ్వాగ్
"జడేజా కంకషన్ విషయంలో మన జట్టు సరైన నిర్ణయమే తీసుకుంది. జడేజా ఆడేందుకు, బౌలింగ్ చేయడానికి సిద్ధంగా లేడు. ఎందుకంటే బంతి హెల్మెట్ను తాకగానే కంకషన్ జరిగిందని ఎవరూ చెప్పలేరు. ఆ లక్షణాలు కనిపించడానికి 24 గంటలు పట్టొచ్చు. కాబట్టి కోహ్లీసేన అవకాశాన్ని సరైన సమయంలోనే ఉపయోగించుకుంది. ఆస్ట్రేలియా జట్టు ఈ విషయంలో ఫిర్యాదు చేయడానికి లేదు. ఎందుకంటే ఈ నియమాన్ని మొదటగా ఉపయోగించింది వాళ్లే కదా!" అని సెహ్వాగ్ వెల్లడించాడు.
టీమ్ఇండియా ఆ నిబంధన అతిక్రమించింది: సంజయ్
"కంకషన్ విషయంలో మ్యాచ్ రిఫరీ టీమ్ఇండియా వైపే ఉండొచ్చు కానీ మన జట్టు ఓ నిబంధనను అతిక్రమించింది. హెల్మెట్కు బంతి తాకిన వెంటనే ఆ బ్యాట్స్మన్తో ఫిజియో కొంచెం సేపు ఉండాలి. కానీ ఇక్కడ అలా జరగలేదు. కొంతసేపు తర్వాత జడేజా యథావిధిగా బ్యాటింగ్ చేసేశాడు. చాహల్-జడేజా విషయంలో నాకు ఎలాంటి సమస్య లేదు. బంతి తగిలిన వెంటనే డాక్టర్, ఫిజియో రాకపోవడమే నిబంధన అతిక్రమణ కిందకు వస్తుంది" అని సంజయ్ మంజ్రేకర్ చెప్పాడు.
