ఇంగ్లాండ్ గడ్డపై జరిగే టెస్టు, టీ20 సిరీస్లో తలపడేందుకు పాకిస్థాన్ జట్టు సిద్ధమైంది. మొత్తం 20 మంది ఆటగాళ్లు, 11 మంది సహాయక సిబ్బందితో కూడిన బృందం ఆదివారం ఇంగ్లాండ్కు బయలుదేరుతుందని ఆ దేశ క్రికెట్ బోర్డు(పీసీబీ) తెలిపింది. తాజాగా, కరోనా వైరస్ సోకిన 10 మంది క్రికెటర్లకు రెండోసారి పరీక్షలు నిర్వహించగా ఆరుగురికి నెగిటివ్ నిర్ధరణ అయ్యింది. వీరు లేకుండానే మిగతా బృందం ఇంగ్లాండ్కు వెళ్లబోతుంది.
అదనపు ఆటగాళ్లలో ఫాస్ట్ బౌలర్ ముసా ఖాన్, వికెట్ కీపర్ రోహైల్ నజీల్లకూ నెగిటివ్గా తేలినట్లు పీసీబీ వెల్లడించింది. ఈ క్రమంలోనే వారు కూడా జట్టుతో కలిసి వెళ్లనున్నట్లు తెలిపింది.
గతంలో పాజిటివ్గా తేలిన 10 మంది ఆటగాళ్లకు.. మరో రెండుసార్లు పరీక్షలు చేసి నెగిటివ్ నిర్ధరణ అయిన తర్వాతనే వారిని ఈ పర్యటనకు పంపించనున్నట్లు పీసీబీ స్పష్టం చేసింది. ప్రస్తుతం రెండో పరీక్షల్లో నెగిటివ్ నిర్ధరణ అయిన ఆటగాళ్లకు మూడో దశ పరీక్షలు నిర్వహిస్తామని తెలిపింది.
ఈ 10 మంది ఆటగాళ్లలో ఫకర్ జమాన్, మహ్మద్ హస్నైన్, మహ్మద్ హఫీజ్, మహ్మద్ రిజ్వాన్, షాదాబ్ ఖాన్, వాహబ్ రియాజ్లకు రెండోసారి పరీక్షల్లో ఫలితం నెగటివ్గా వచ్చింది. హైదర్ అలీ, హరిస్ రౌఫ్, కాశిఫ్ భట్టి, ఇమ్రాన్ ఖాన్లతో పాటు మలంగ్ అలీకి రెండోసారీ పాజిటివ్గా తేలింది.
ఇదీ చూడండి.. 'సచిన్.. మరెన్నో తరాలకు మీరు స్ఫూర్తిగా నిలవాలి'
