అబుదాబి టీ10 లీగ్లో నార్తర్న్ వారియర్స్ బ్యాట్స్మన్ నికోలస్ పూరన్ సునామీ సృష్టించాడు. బంగ్లా టైగర్స్తో జరిగిన మ్యాచ్లో 26 బంతుల్లోనే 89 పరుగులు సాధించి జట్టు విజయంలో కీలకపాత్ర పోషించాడు.
తొలుత టాస్ ఓడి బ్యాటింగ్కు దిగిన నార్తర్న్ వారియర్స్కు శుభారంభం లభించింది. ఓపెనర్ వసీమ్ మహమ్మద్ తొలి ఓవర్లలోనే రెండు సిక్సులు బాదాడు. ఫలితంగా మొదటి ఓవర్లోనే 17 పరుగులు రాబట్టుకుంది జట్టు. అయితే 12 పరుగులు చేసిన తర్వాత వసీం ఔటయ్యాడు. అనంతరం క్రీజులోకి వచ్చిన నికోలస్ పూరన్ సిక్స్తో ఖాతా తెరిచాడు. తర్వాత సిమ్మన్స్ కూడా సిక్స్ సాధించడం వల్ల ఆ ఓవర్లో 16 పరుగులు వచ్చాయి.
తర్వాత పూరన్ బౌలర్లను ఊచకోత కోస్తూ పరుగులు రాబట్టాడు. ఇతడి ధాటికి బౌలర్ల వద్ద సమాధానం లేకపోయింది. సిక్సులే టార్గెట్గా రెచ్చిపోయిన ఇతడు 26 బంతుల్లోనే 89 పరుగులు చేసి కరీమ్ జనత్ బౌలింగ్లో ఔటయ్యాడు. ఈ ఇన్నింగ్స్లో ఇతడు 3 ఫోర్లతో పాటు 12 సిక్సులు బాదాడు. ఫలితంగా వారియర్స్ నిర్ణీత 10 ఓవర్లలో 162 పరుగులు సాధించింది.
163 పరుగుల లక్ష్యంతో బరిలోకి దిగిన బంగ్లా టైగర్స్ నిర్ణీత ఓవర్లలో మూడు వికెట్ల నష్టానికి 132 పరుగులు మాత్రమే చేసి ఓటమిపాలైంది. కెప్టెన్ ఆండ్రూ ఫ్లెచర్ (53) అర్ధసెంచరీతో ఆకట్టుకోగా చిరాగ్ సూరి 42 పరుగులతో రాణించాడు.
రికార్డులు
- టీ10 లీగ్లో పూరన్కు ఇది ఐదో అర్ధసెంచరీ. ఈ లీగ్లో అత్యధిక హాఫ్ సెంచరీలు ఇతడివే.
- ఈ మ్యాచ్లో 12 సిక్సులు బాదాడు పూరన్. ఈ లీగ్లో ఓ మ్యాచ్లో ఇదే వ్యక్తిగత అత్యధికం.
- ఈ మ్యాచ్లో 89 పరుగులు సాధించాడు పూరన్. లీగ్లో ఇది రెండో అత్యధిక స్కోర్. క్రిస్ లిన్ 2019 సీజన్లో 91 పరుగులతో నాటౌట్గా నిలిచాడు.
