టీమ్ఇండియా మాజీ కెప్టెన్ మహేంద్ర సింగ్ ధోనీ ఇప్పటికీ ఫిట్గా ఉన్నాడని తొందరపడి అతడిని జట్టు నుంచి పక్కన పెట్టొద్దని మాజీ క్రికెటర్ మహ్మద్ కైఫ్ కోరాడు. వికెట్ కీపర్గా ధోనీ గాయాలతో వైదొలిగినప్పుడు మాత్రమే కేఎల్ రాహుల్ను బ్యాకప్ లాగా ఉపయోగించాలని సూచించాడు. 2019 ప్రపంచకప్ తర్వాత మహీ ఏ అంతర్జాతీయ మ్యాచ్లకు ప్రాతినిధ్యం వహించలేదు. అందువల్ల అతడు రిటైర్మెంట్ ప్రకటిస్తాడని వార్తలొచ్చాయి. అయితే మహేంద్రుడు ఇప్పటివరకు ఈ విషయంపై స్పందించలేదు.
"ఐపీఎల్లో ప్రదర్శనను బట్టి ధోనీ భవిష్యత్ ఆధారపడి ఉంటుందని పలువురు అభిప్రాయపడుతున్నారు. కానీ, నా దృష్టిలో ధోనీ ఉత్తమ ఆటగాడు. బ్యాటింగ్లో 6, 7 స్థానాల్లో బరిలో దిగి.. ఒత్తిడిని జయిస్తూ అతడిలా ఆడటం కష్టం. అందుకే ధోనీ నా దృష్టిలో నెంబర్వన్ ఆటగాడు. ఎంతోమంది క్రికెటర్లు జట్టులోకి వస్తూ ఉంటారు, పోతూ ఉంటారు అదేమి పెద్ద సమస్య కాదు. కానీ, ఎవర్ని అయినా జట్టులో నుంచి తీసివేసే ముందు అతని స్థానంలో సరిపోయే వ్యక్తిని ముందుగా ఎంపిక చేసుకోవాలి. కేఎల్ రాహుల్ వికెట్ కీపర్గా సరిపోతాడు. కానీ, ధోనీ అంతటి నేర్పరి కాదు. ధోనీకి గాయాలైనపుడు రాహుల్ను కీపర్గా ఉంచడం ఉత్తమం. ప్రపంచకప్లో కివీస్పై జరిగిన సెమీఫైనల్ మ్యాచ్లో జడేజాతో కలిసి మహీ అద్భుతమైన భాగస్వామ్యం నెలకొల్పాడు. వారిద్దరి వల్ల ఆ మ్యాచ్లో విజయం అంచుల వరకు వెళ్లాం".
-మహ్మద్ కైఫ్, టీమ్ఇండియా మాజీ క్రికెటర్
జట్టులోకి ధోనీని తిరిగి తీసుకోవడమనేది ఐపీఎల్ ప్రదర్శనపై ఆధారపడి ఉంటుందని పలువురు విశ్లేషకులు అభిప్రాయపడుతున్నారు. ఈ లీగ్లో సత్తాచాటడానికి మార్చిలో చెన్నె సూపర్కింగ్స్ ఆటగాళ్ల శిక్షణా శిబిరంలో చేరాడు ధోనీ. కానీ, కరోనా లాక్డౌన్ కారణంగా మార్చి 29 నుంచి జరగాల్సిన ఐపీఎల్ నిరవధికంగా వాయిదా పడింది.
ఇదీ చూడండి.. స్టేడియంలో శృంగార బొమ్మలు.. నిర్వాహకులకు జరిమాన!
