మహిళల బిగ్బాష్ లీగ్(డబ్ల్యూబీబీఎల్) సమయంలో మహిళల టీ20 ఛాలెంజ్ నిర్వహించడం పట్ల విదేశీ క్రీడాకారిణుల నిరాశ అర్థం చేసుకోదగిందేదనని తెలిపింది టీమ్ ఇండియా కెప్టెన్ మిథాలీ రాజ్. అయితే ప్రస్తుత అసాధారణ పరిస్థితుల్లో బీసీసీఐ తీసుకున్న నిర్ణయం నూటికి నూరుశాతం సరైనదని చెప్పింది. బోర్డు అత్యుత్తమ కృషి ఫలితంగానే టీ20 ఛాలెంజ్ జరగుతుందని పేర్కొంది.
యూఏఈలో ఐపీఎల్ మధ్యలో నవంబర్ 1 నుంచి 10 వరకు టీ20 ఛాలెంజ్ జరిగే అవకాశముంది. అక్టోబర్ 17 నుంచి నవంబర్ 29 వరకు డబ్ల్యూబీబీఎల్ నిర్వహిస్తున్నారు. దీనిపై అలీసా హేలీ, సుజీ బేట్స్, రాచెల్ హేన్స్ వంటి క్రీడాకారిణులు అసంతృప్తి వ్యక్తంజేశారు.
"కొందరు త్వరగా ఓ అంచనాకు వచ్చేస్తున్నారు. బీసీసీఐ అధ్యక్షుడు సౌరభ్ గంగూలీ, కార్యదర్శి జై షా, ఐపీఎల్ ఛైర్మన్ బ్రిజేష్ పటేల్ మహిళల క్రికెట్ను ఎంతగానో ప్రోత్సహిస్తున్నారు. కరోనా మహమ్మారి నేపథ్యంలో టీ20 ఛాలెంజ్ నిర్వహిస్తారని ఊహించలేదు. అసలు ఐపీఎల్ జరుగుతుందనే అనుకోలేదు. అలాంటిది మహిళల మ్యాచ్లు నిర్వహించడాన్ని స్వాగతించాల్సిందే. కొందరు విదేశీ క్రీడాకారిణులు మ్యాచ్ల తేదీలను ప్రశ్నిస్తున్నారు. వారి నిరాశ అర్థం చేసుకోదగిందే. వాళ్లు కూడా ఆడాలని కోరుకుంటున్నారు. అత్యుత్తమ క్రీడాకారిణులు ఆడాలన్నదే నా అభిప్రాయం కూడా. కాని ఇవి అసాధారణ పరిస్థితులు. సాధారణంగా ఏప్రిల్-మే నెలల్లో ఐపీఎల్ జరిగేది. డబ్ల్యూబీబీఎల్ సమయంలో ఈ టోర్నీ ఉండేది కాదు. ప్రస్తుత పరిస్థితుల్లో బోర్డు నిర్ణయం సరైనదే"
-- మిథాలీ రాజ్, భారత మహిళా క్రికెటర్
భారత్లో కరోనా వ్యాప్తి ఎక్కువగా ఉన్న నేపథ్యంలో ఈ ఏడాది ఐపీఎల్ యూఏఈ వేదికగా జరగనుంది. సెప్టెంబర్ 19న మొదలై నవంబర్ 10న టోర్నీ ముగియనుంది.
