ఇంగ్లాండ్లో జరుగుతున్న మహిళా క్రికెట్ సూపర్ లీగ్లో భారత క్రీడాకారిణీలు మెరిశారు. టీమిండియా టీ20 జట్టు సారథి హర్మన్ ప్రీత్ కౌర్, స్మృతి మంధాన అర్ధశతకాలతో ఆకట్టుకున్నారు. ఈ టోర్నీలో మంధానకిది వరుసగా రెండో హాఫ్ సెంచరీ.
వెస్టర్న్ స్టోర్మ్ తరఫున ఆడుతున్న మంధాన.. లాంకషైర్ థండర్తో జరిగిన మ్యాచ్లో 43 బంతుల్లో 72 పరుగులు చేసి సత్తాచాటింది. ఇందులో 9 ఫోర్లు, 2 సిక్సులు ఉన్నాయి. ఫలితంగా స్టోర్మ్ జట్టు విజయం సాధించింది. ముందు మ్యాచ్లో 47 బంతుల్లో 70 పరుగులు చేసిందీ భారత క్రికెటర్.
భారత మహిళా టీ20 జట్టు సారథి హర్మన్ ప్రీత్ అర్ధసెంచరీతో మెరిసింది. మంధాన ప్రత్యర్థి జట్టు లాంకషైర్ తరఫున ఆడిన ఈ క్రికెటర్ 50 పరుగులు చేసింది. అయినా జట్టును గెలిపించలేకపోయింది.
మహిళా క్రికెట్ సూపర్ లీగ్లో మంధాన.. ఇప్పటివరకు అత్యధిక పరుగులు సాధించిన క్రికెటర్గా కొనసాగుతోంది. ఆరు మ్యాచ్ల్లో 235 పరుగులు చేసి టాప్ స్కోరర్గా కొనసాగుతోంది. హర్మన్ 210 పరుగులతో ఉంది.
ఈ లీగ్లో మంధాన ప్రాతినిధ్యం వహిస్తున్న వెస్టర్న్ స్టోర్మ్ జట్టు ఇప్పటివరకు ఒక్క మ్యాచ్లోనూ ఓడిపోలేదు. హర్మన్ ప్రీత్ లాంకషైర్ థండర్స్ ఒక్క విజయాన్నీ నమోదు చేయలేదు.
ఇవీ చూడండి.. భారత క్రికెటర్లపై దాడి చేస్తామని పీసీబీకి మెయిల్
