ఐపీఎల్.. ప్రపంచంలోనే అత్యంత ధనిక లీగ్. దేశీయ, విదేశీ క్రికెటర్లు కలిసి ఈ టోర్నీలో అదరగొడుతుంటారు. ప్రతిభావంతులైన హార్డ్ హిట్టింగ్ బ్యాట్స్మెన్ దగ్గర నుంచి అద్భుత బౌలర్లు, వికెట్ కీపర్లు పాల్గొంటారు. ఈ లీగ్ 13వ సీజన్ సెప్టెంబరు 19 నుంచి ప్రారంభంకానుంది. ధోనీ వ్యూహాలతో, కోహ్లీ అరుపులతో, రోహిత్ మెరుపులతో మైదానాలు సందడిగా మారనున్నాయి. ఈ నేపథ్యంలో త్వరలో ప్రారంభంకానున్న లీగ్లో సత్తా చాటే విదేశీ ఆటగాళ్లపై ఓ లుక్కేద్దాం.
క్రిస్ గేల్(కింగ్స్ ఎలెవన్ పంజాబ్)
ఈ పేరు చెప్పగానే మెరుపు ఇన్నింగ్స్లు కళ్లముందు మెదులుతాయి. మైదానంలో బద్ధకంగా కదిలే గేల్ బ్యాటింగ్కు వచ్చేసరికి మాత్రం చెలరేగిపోతాడు. బంతి పడటమే ఆలస్యం బౌండరీ దాటించేస్తాడు. ఇతడు మంచి ఫామ్లో ఉన్నాడంటే బౌలర్లకు ఎక్కడ బాల్ వేయాలో అంతుచిక్కదు. 40 ఏళ్ల ఈ క్రికెటర్ ఇంకా తనలో ఆట మిగిలుందని చెబుతుంటాడు. ఇతడు కరీబియన్ జట్టు తరఫున 462 మ్యాచ్లు ఆడి 38.79 సగటుతో 19,321 పరుగులు సాధించాడు. ఇందులో 42 సెంచరీలు, 104 హాఫ్ సెంచరీలు ఉన్నాయి. మరోవైపు ఐపీఎల్ కెరీర్లో మొత్తంగా 125 మ్యాచులు ఆడగా.. 4484 పరుగులు చేశాడు. గతేడాది పంజాబ్కు ప్రాతినిథ్యం వహించిన గేల్.. తన మాజీ ఫ్రాంచైజీ రాయల్ ఛాలెంజర్స్ బెంగళూరు (ఆర్సీబీ) జట్టుపై 60 బంతుల్లో 99 పరుగుల(10 ఫోర్లు, 5 సిక్సర్లు)తో అజేయంగా నిలిచాడు. ఆ మ్యాచ్లో పంజాబ్ స్కోరును 173కు చేర్చడంలో ప్రధానపాత్ర వహించాడు గేల్.
జోష్ ఫిలిప్ (రాయల్ ఛాలెంజర్స్ బెంగళూరు)
ఆస్ట్రేలియాకు చెందిన జోష్ ఫిలిప్.. పరిమిత ఓవర్ల క్రికెట్లో అత్యుత్తమ ప్రతిభ కనబరుస్తున్నాడు. ఏడాది ప్రారంభంలో జరిగిన బిగ్బాష్ లీగ్లో అద్భుత ప్రదర్శనతో ఆకట్టుకున్నాడు. ఆ టోర్నీలో 37.46 సగటుతో 487 పరుగులతో అత్యధిక రన్స్ చేసిన మూడో బ్యాట్స్మన్గా నిలిచాడు. మెల్బోర్న్ స్టార్స్పై జరిగిన ఫైనల్ మ్యాచ్లో 29 బంతుల్లో 52 పరుగులు సాధించి సిడ్నీ సిక్సర్స్ జట్టుకు విజయాన్ని అందించడం సహా మ్యాన్ ఆఫ్ ద మ్యాచ్ అవార్డు దక్కించుకున్నాడు.
ఐపీఎల్-2020 వేలంలో ఈ ఆటగాడికి నిర్ణయించిన రేటు కంటే తక్కువ మొత్తాన్ని వెచ్చించి (రూ.20 లక్షలు) రాయల్ ఛాలెంజర్స్ యాజమాన్యం సొంతం చేసుకుంది.
ప్యాట్ కమిన్స్(కోల్కతా నైట్ రైడర్స్)
ఆస్ట్రేలియా పేసర్ ప్యాట్ కమిన్స్ ఈ ఏడాది ఐపీఎల్ వేలంలో సంచలనం సృష్టించాడు. రూ.2 కోట్ల కనీస ధరతో వేలంలో పాల్గొన్న ఈ ఆటగాడు ఏకంగా రూ.15.50 కోట్లు పలికాడు. కోల్కతా నైట్ రైడర్స్ ఇతడిని సొంతం చేసుకుంది. 2012, 2014 ఐపీఎల్ విజేతగా నిలిచిన కేకేఆర్.. ఈ ఏడాది మూడోసారి ట్రోఫీని గెలవాలనే లక్ష్యంతో పెద్ద మొత్తం వెచ్చించి మరీ కమిన్స్ను తీసుకుంది.
గ్లెన్ మ్యాక్స్వెల్ (కింగ్స్ ఎలెవన్ పంజాబ్)
మానసిక ఆరోగ్య సమస్యల కారణంగా చాలా కాలం క్రికెట్కు దూరమయ్యాడు. అయినా ఇంగ్లాండ్తో జరిగిన సిరీస్లో అద్భుతంగా రాణించాడు. ఆరు వికెట్లు పడగొట్టాడు. ఐపీఎల్-2020 వేలంలో అత్యధిక ధరకు అమ్ముడుపోయిన 10 మంది ఆటగాళ్లలో ఆసీస్ ఆల్రౌండర్ గ్లెన్ మ్యాక్స్వెల్ ఒకడు. రూ. 10.75 కోట్లతో ఇతడిని కింగ్స్ ఎలెవన్ పంజాబ్ జట్టు దక్కించుకుంది. ఈ లీగ్ కెరీర్లో ఇప్పటివరకు ఆడిన 69 మ్యాచ్ల్లో 1,397 పరుగులు చేశాడు.
అలెక్స్ కారే (దిల్లీ క్యాపిటల్స్)
వికెట్ కీపింగ్లో నైపుణ్యాలను అద్భుతంగా ప్రదర్శిస్తున్నాడు ఆస్ట్రేలియాకు చెందిన అలెక్స్ కారే. దీంతో పాటు స్టార్ బ్యాట్స్మన్గా గుర్తింపు పొందాడు. 2015-16 సీజన్లో 500 పరుగులు సాధించి.. వికెట్ కీపర్గా 50 ఔట్లలో పాలుపంచుకున్నాడు. ఐపీఎల్లో దిల్లీ క్యాపిటల్స్ జట్టులో కీపర్గా రిషబ్ పంత్ ఉండగా.. అతడికి ప్రత్యామ్నాయంగా కారేను జట్టులోకి తీసుకున్నారు.
స్టీవ్ స్మిత్ (రాజస్థాన్ రాయల్స్
బాల్ ట్యాంపరింగ్ వివాదంతో సంవత్సరం పాటు నిషేధానికి గురయ్యాడు స్మిత్. అయినా 2019 ఐపీఎల్లో అదరగొట్టాడు. ఆ టోర్నీ మధ్యలోనే ఫ్రాంచైజీ అతడికి సారథి బాధ్యతలు అప్పగించింది. ఈ సీజన్కూ కెప్టెన్గా కొనసాగుతున్నాడు. మొత్తంగా ఐపీఎల్ కెరీర్లో 81 మ్యాచులు ఆడగా 2,022 పరుగులు చేశాడు. ఒక సెంచరీ.. ఎనిమిది అర్ధశతకాలు బాదాడు.
జోఫ్రా ఆర్చర్ (రాజస్థాన్ రాయల్స్)
వెస్టిండీస్ యువ పేసర్ జోఫ్రా ఆర్చర్.. గంటకు 90కిలో మీటర్ల వేగంతో బంతిని విసరగల సామర్థ్యం కలిగిన ఆటగాడు. 25ఏళ్ల వయసుకే సారథ్య బాధ్యతలు కూడా వహించాడు. మొత్తంగా ఐపీఎల్ కెరీర్లో 21 మ్యాచులు ఆడగా.. 616 పరుగులు చేశాడు. గతేడాది 11 మ్యాచ్ల్లో 11 వికెట్లు సాధించాడు.
ఇదీ చూడండి గంగూలీ బయోపిక్లో హృతిక్.. కానీ ఒక్క షరతు
