టీమ్ఇండియా మాజీ కెప్టెన్ మహేంద్ర సింగ్ ధోనీ పరుగులు సాధించే సామర్థ్యం తనను ఆశ్చర్యానికి గురి చేస్తుందని దక్షిణాఫ్రికా బ్యాట్స్మన్ డేవిడ్ మిల్లర్ అన్నాడు. ధోనీలా ఆడటమే తన లక్ష్యమని ఓ స్పోర్ట్స్ ఛానెల్కు ఇచ్చిన ఇంటర్వ్యూలో చెప్పాడు. ఈ ఏడాది ఐపీఎల్లో మిల్లర్.. రాజస్థాన్ రాయల్స్కు ప్రాతినిధ్యం వహించనున్నాడు.
"ధోనీ వ్యవహార శైలి నిజంగా అద్భుతం. కచ్చితంగా నేను అతనిలాగే బ్యాటింగ్ చేయాలనుకుంటా. అతనిలాగే మ్యాచ్లను అద్భుతంగా ముగించాలనిపిస్తుంది. టెక్నిక్ పరంగా ప్రతి ఒక్క ఆటగాడికి సొంత శైలి ఉంటుంది. ప్రపంచ వ్యాప్తంగా ఉన్న అత్యుత్తమ ఫినిషర్లలో ధోనీ ఒకరని కచ్చితంగా చెప్పగలను."
-డేవిడ్ మిల్లర్, దక్షిణాఫ్రికా క్రికెటర్
కాగా జట్టులో ఇప్పటివరకు తనకు ఎటువంటి ప్రత్యేక స్థానాన్ని కేటాయించలేదని మిల్లర్ పేర్కొన్నాడు. ప్రస్తుతం ప్రాక్టీసులో ఉన్న ఆటగాళ్లంతా.. లీగ్ కోసం బాగా కష్టపడుతున్నారని తెలిపాడు.
"రాజస్థాన్ రాయల్స్ కోచ్ ఆండ్రూ మెక్డొనాల్డ్తో ఇంకా ఎటువంటి చర్చలు జరపలేదు. కాబట్టి, ప్రస్తుతం ప్రాక్టీసుపై దృష్టి పెడుతున్నా. గత కొన్ని నెలలుగా క్రికెట్కు దూరంగా ఉన్నా. ఇప్పుడు ఫిట్నెస్ను పెంపొందించుకోవాల్సిన అవసరం ఉంది. జట్టు సభ్యుల స్థానాలు, ప్రణాళికలపైనా ఎటువంటి నిర్ణయం తీసుకోలేదు" అని మిల్లర్ తెలిపాడు.
సెప్టెంబరు 19న యూఏఈ వేదికగా ఐపీఎల్ ప్రారంభం కానుంది. తొలి మ్యాచ్లో ముంబయి ఇండియన్స్- సీఎస్కే జట్లు తలపడనున్నాయి.
