డిఫెండింగ్ ఛాంపియన్ యువ టీమిండియా మరోసారి ప్రపంచకప్ నెగ్గాలని పట్టుదలతో ఉంది. అండర్-19 వరల్డ్కప్లో ఓటమి ఎరుగని జట్టుగా తన ఆధిపత్యాన్ని కొనసాగిస్తూ తొలి సెమీఫైనలిస్టుగా అడుగుపెట్టింది ప్రియమ్‌ గార్గ్‌ నేతృత్వంలోని భారత జట్టు. అయితే ఈ మెగాటోర్నీ సెమీస్లోనే దాయాది దేశం పాకిస్థాన్తో అమీతుమీ తేల్చుకోనుంది. దక్షిణాఫ్రికా వేదికగా జరగుతున్న ప్రపంచకప్లో... ఫిబ్రవరి 4న ఈ ఇరుజట్ల మధ్య పోరు జరగనుంది.
క్వార్టర్స్లో ఆస్ట్రేలియాకు షాక్...
భారత యువ జట్టు ఆస్ట్రేలియా లాంటి బలమైన ప్రత్యర్థిని మట్టికరిపించి అండర్-19 ప్రపంచకప్ సెమీఫైనల్లో అడుగుపెట్టింది. మంగళవారం (జనవరి 28) జరిగిన క్వార్టర్స్లో 74 పరుగుల తేడాతో ఆస్ట్రేలియాపై ఘనవిజయం సాధించింది. బ్యాటింగ్లో యశస్వి జైస్వాల్‌, అథర్వ అంకోలేకర్‌, బౌలింగ్లో కార్తీక్‌ త్యాగి, ఆకాశ్‌సింగ్‌ అదరగొట్టేశారు. ఈ గెలుపుతో 2008 తర్వాత అండర్-19 ప్రపంచకప్లో ఆస్ట్రేలియాను సెమీస్ చేరకుండా తొలిసారి అడ్డుకుంది భారత యువ జట్టు. అంతేకాకుండా అండర్-19 ప్రపంచకప్లో కంగారూ జట్టుపై గెలిచి... భారత్ వరుసగా పదో విజయం ఖాతాలో వేసుకుంది.
పదమూడోసారి అండర్-19 ప్రపంచకప్ ఆడుతున్న యువ భారత్ సెమీస్ చేరుకోవడం ఇది తొమ్మిదోసారి. అత్యధికంగా నాలుగుసార్లు ఛాంపియన్‌గా నిలిచిన ఘనత భారత్‌దే.
క్వార్టర్ ఫైనల్ మ్యాచ్ల తర్వాత టాప్-4 జట్లు ఖారారయ్యాయి. ఇందులో భారత్, న్యూజిలాండ్, బంగ్లాదేశ్, పాకిస్థాన్ టైటిల్ పోరుకు అర్హత సాధించాయి.
- భారత్ X ఆస్ట్రేలియా --- భారత్
- వెస్టిండీస్ X న్యూజిలాండ్ --- న్యూజిలాండ్
- బంగ్లాదేశ్ X దక్షిణాఫ్రికా --- బంగ్లాదేశ్
- అఫ్గానిస్థాన్ X పాకిస్థాన్ --- పాకిస్థాన్
ఫిబ్రవరి 4న తొలి సెమీఫైనల్లో భారత్-పాకిస్థాన్ తలపడనున్నాయి. రెండో సెమీస్లో న్యూజిలాండ్- బంగ్లాదేశ్ పోటీపడనున్నాయి. ఈ మ్యాచ్ల్లో గెలిచిన విజేతలు ఫిబ్రవరి 9న టైటిల్ పోరులో తలపడతారు.
