జులైలో భారత టాప్ క్రికెటర్లకు ఆరు వారాల క్యాంప్ను నిర్వహించడానికి సన్నాహాలు చేస్తోంది భారత క్రికెట్ నియంత్రణ మండలి(బీసీసీఐ). ఈ క్యాంప్లో మాజీ కెప్టెన్ మహేంద్రసింగ్ ధోనీకి అవకాశాన్ని కల్పిస్తారా? లేదా? అనే దానిపై రకరకాల ఊహాగానాలు వినిపిస్తున్నాయి.
ఆరోగ్య భద్రతను దృష్టిలో ఉంచుకుని జులై మూడో వారం నుంచి ఈ శిబిరాన్ని నిర్వహించడానికి ఓ సురక్షిత వేదికను త్వరలోనే నిర్ణయించనుంది బీసీసీఐ. ఒకవేళ అది సాధ్యం కాకపోతే ఆటగాళ్లు వారి ఐపీఎల్ శిక్షణా శిబిరాలకు వెళతారని తెలుస్తోంది.
టీమ్ఇండియా టాప్ ఆటగాళ్లతో శిక్షణా శిబిరం ఏర్పాటు బీసీసీఐ సన్నాహాలు చేస్తుంటే ధోనీని ఇందులో ఎంపిక చేస్తారా? లేదా? అనేది ఇప్పుడు అందర్ని తొలుస్తున్న ప్రశ్న. ఎందుకంటే గతేడాది ప్రపంచకప్ తర్వాత బీసీసీఐ ఒప్పందం నుంచి తొలగించడమే అందుకు కారణం. ధోనీని శిక్షణా శిబిరానికి బీసీసీఐ ఎంపిక చేస్తుందా.. అనే అంశంపై పలువురు క్రీడా విశ్లేషకులు ఏమంటున్నారో తెలుసుకుందామా.
క్యాంప్లో ధోనీ ఉండాలి
శిక్షణా శిబిరంలో ధోనీ ఉండడం వల్ల యువ కీపర్లను గైడ్ చేయగలడని అభిప్రాయపడ్డాడు టీమ్ఇండియా మాజీ సెలక్టర్ ఎమ్మెస్కే ప్రసాద్. "టీ20 ప్రపంచకప్ జరుగుతుందో లేదో నాకు స్పష్టత లేదు. ఒకవేళ అది జరిగితే టోర్నీకి ముందు శిక్షణా శిబిరాన్ని నిర్వహిస్తారు. అందులో ధోనీ కచ్చితంగా ఉండాలి. టీ20 ప్రపంచకప్ జరగకపోతే ద్వైపాక్షిక సిరీస్ల కోసం ఇప్పటికే కేఎల్ రాహుల్, రిషబ్ పంత్, సంజు శాంసన్ జట్టుకు అందుబాటులో ఉన్నారు" అని ఎమ్మేస్కే ప్రసాద్ అన్నాడు.
టీమ్లో కచ్చితంగా ఉంటాడు
టీమ్ఇండియా ఆడే ప్రతీ మ్యాచ్లో ధోనీకి తప్పక స్థానం ఉండాలని ఆశిస్తున్నాడు మాజీ క్రికెటర్ ఆశిష్ నెహ్రా. "నేను అంతర్జాతీయ జట్టు సెలక్టర్ అయితే జట్టులో ధోనీకి కచ్చితంగా స్థానం ఉంటుంది. కానీ, ప్రస్తుతం అతను ఆడటానికి సిద్ధంగా ఉన్నాడా? లేదా? అనేది పెద్ద ప్రశ్న. అది ధోనీ కోరుకునే దానిపై ఆధారపడి ఉంటుంది" అని నెహ్రా అన్నాడు. ఒకవేళ అంతర్జాతీయ జట్టులో రావాలని ధోనీ అనుకుంటే..ఐపీఎల్ తన ఉత్తమ ప్రదర్శన కనబరిస్తే చాలని అభిప్రాయపడ్డాడు నెహ్రా.
ధోనీని పక్కన పెట్టగలమా!
బీసీసీఐ ఏర్పాటు చేసే శిక్షణా శిబిరంలో ధోనీకి ఉన్న ఆసక్తి గురించి సెలక్టర్లు ఒకసారి అతడితో మాట్లాడాలని టీమ్ఇండియా మాజీ కీపర్ దీప్ దాస్గుప్తా సూచించారు. "క్యాంప్లో ధోనీ భాగమైతే భవిష్యత్ కీపర్లను గైడ్ చేస్తాడు. ఒకవేళ శిబిరంలో భాగం కాకపోతే ఐపీఎల్ మరో మార్గంగా ఉంది. నాలుగో బ్యాటింగ్ స్థానంలో బరిలో దిగి 500 పరుగులు చేసే ధోనీని జట్టు నుంచి పక్కన పెట్టగలరా?" అని దాస్గుప్తా వెల్లడించాడు.
యువ ఆటగాళ్లకు ఛాన్స్ ఇవ్వాలి
టీమ్ఇండియా ఆటగాళ్లకు జులై శిక్షణా శిబిరాన్ని ఏర్పాటు చేస్తే.. అందులో యువ ఆటగాళ్లకు స్థానం కల్పించాలని అభిప్రాయపడ్డాడు టీమ్ఇండియా స్పిన్నర్ హర్భజన్ సింగ్. "క్యాంపులో సూర్యకుమార్ యాదవ్, అండర్-19 లెగ్ స్పిన్నర్ రవి బిష్ణోయ్, యశస్వీ జైశ్వాల్లను చూడాలనుకుంటున్నా. ఎందుకంటే ఈ శిబిరంలో వారు పాల్గొనడం వలన సీనియర్ క్రికెటర్ల నుంచి పరస్పరం ఆట గురించి చర్చించుకునే అవకాశం వస్తుంది. భారత టీ20 జట్టులో స్థానం దక్కించుకోవడానికి సూర్యకుమార్ యాదవ్ అర్హుడు" అని హర్భజన్ తెలిపాడు.
అలా జరిగితే ఆశ్చర్యమే!
ధోనీ ఈ క్యాంప్కు ఎంపికైతే అంతకన్నా ఆశ్చర్యం మరోకటి ఉండదని కొంతమంది సీనియర్ అధికారులు అభిప్రాయాన్ని వ్యక్తం చేస్తున్నారు. ఏడాది పాటు జట్టుకు దూరంగా ఉన్న ఆటగాడు ధోనీ.. ప్రస్తుతం అతడి ఫిట్నెస్ స్థాయి తెలియకుండా శిక్షణా శిబిరానికి ఎలా ఎంపిక చేస్తారని అధికారులు అంటున్నారు. మరోవైపు బీసీసీఐ సెంట్రల్ కాంట్రాక్టు నుంచి వైదొలగడం సహా గతేడాది వెస్డిండీస్తో జరిగిన టీ20 మ్యాచ్ల్లోనూ జట్టులో ఎంపిక చేయని పక్షంలో క్యాంపుకు ధోనీని ఎంపిక చేస్తే అంతకన్నా ఆశ్చర్యం మరోకటి ఉండదని విశ్లేషకులు అంటున్నారు.
ఇదీ చూడండి... 'ఆ మ్యాచ్ కోసం బౌలర్లు ఆసక్తిగా ఎదురుచూస్తున్నారు'
