కరోనా సంక్షోభం కారణంగా మరో ద్వైపాక్షిక సిరీస్ వాయిదా పడింది. ప్రపంచ టెస్టు ఛాంపియన్షిప్లో భాగంగా ఆగస్టు-సెప్టెంబరులో జరగాల్సిన రెండు టెస్టుల కోసం న్యూజిలాండ్.. బంగ్లాదేశ్ పర్యటనకు వెళ్లాల్సి ఉంది. కానీ, కరోనా విజృంభణ వల్ల టోర్నీని వాయిదా వేస్తున్నట్లు తాజాగా బంగ్లాదేశ్ క్రికెట్ బోర్డు ప్రకటించింది.
"ప్రస్తుత కరోనా సంక్షోభంలో ఈ సిరీస్ను నిర్వహించడం సవాలుతో కూడుకున్నది. మ్యాచ్లు జరిగే క్రమంలో ఆటగాళ్ల ఆరోగ్య భద్రతలో రాజీ పడలేం. ఈ పరిస్థితులను దృష్టిలో ఉంచుకుని సిరీస్ను వాయిదా వేయాలని ఇరు దేశాల క్రికెట్ బోర్డులు కలిసి నిర్ణయించాం ".
- బంగ్లాదేశ్ క్రికెట్ బోర్డు
కరోనా సంక్షోభాన్ని దృష్టిలో ఉంచుకుని భారత్, శ్రీలంక మధ్య జరగాల్సిన ద్వైపాక్షిక సిరీస్ను ఇరు దేశాల క్రికెట్ బోర్డులు ఇటీవలే రద్దు చేశాయి.
బంగ్లాదేశ్ మాజీ క్రికెటర్ మష్రఫే మొర్తజాతో పాటు స్పిన్నర్ నజ్ముల్ ఇస్లాం, ఓపెనర్ నఫీజ్ ఇక్బాల్కు కరోనా సోకినట్లు ఇటీవలే నిర్ధారణ అయ్యింది. ఇంగ్లాండ్ టూర్కు వెళ్లాల్సిన పాకిస్థాన్కు చెందిన ముగ్గురికి ఈ మహమ్మారి సోకినట్లు తాజాగా వెల్లడైంది. దీంతో క్రికెట్ ప్రపంచం ఆటగాళ్ల భద్రత విషయంలో అప్రమత్తమైంది.
