South Africa Covid Variant: దక్షిణాఫ్రికాలో కరోనా కొత్త వేరియంట్(బీ.1.1.529)తో ప్రపంచదేశాలు వణికిపోతున్నాయి. తమ దేశంలోనూ ఆ వేరియంట్ ప్రభావం కనిపిస్తుందంటూ పలు దేశాలు ఆందోళన వ్యక్తం చేస్తున్నాయి. ఈ నేపథ్యంలో సౌతాఫ్రికాతో పాటు హాంకాంగ్, బోత్స్వానా నుంచి వచ్చే ప్రయాణికులపై ఆంక్షలు(South Africa Travel Ban) విధించేందుకు సిద్ధమవుతున్నాయి. ఇదిలా ఉంటే ఈ కరోనా కొత్త రకంతో భారత్-దక్షిణాఫ్రికా మధ్య జరగబోయే సిరీస్ సందిగ్ధంలో పడింది.
India SA Tour 2021: డిసెంబర్లో దక్షిణాఫ్రికా పర్యటనకు వెళ్లనుంది భారత్. దాదాపు ఏడు వారాల సుదీర్ఘ పర్యటనలో మూడు టెస్టులు, మూడు వన్డేలు, నాలుగు టీ20లు ఆడాల్సి ఉంది. ఇందుకోసం వచ్చే నెల 8న సీనియర్ జట్టు సౌతాఫ్రికాకు పయనమవ్వాలి. ఇప్పటికే ఆ దేశంలో అనధికారిక టెస్టు సిరీస్లో తలపడుతున్న భారత్-ఏ జట్టులో కొందరిని అక్కడే ఉంచేలా ప్లాన్ చేసింది బీసీసీఐ. అసలు సిరీస్ 17న ప్రారంభం కానుంది. ఈ నేపథ్యంలో కొత్త రకం కరోనా ఇరుదేశాల క్రికెట్ బోర్డుల్ని కలవరపెడుతోంది. దీనిపై స్పందించిన ఓ బీసీసీఐ అధికారి.. ఈ విషయమై ప్రభుత్వ నిర్ణయం కోసం ఎదురుచూస్తున్నట్లు తెలిపారు.
"దక్షిణాఫ్రికా క్రికెట్ బోర్డు వారి దేశంలోని పూర్తి పరిస్థితిపై స్పష్టత ఇచ్చేవరకు మేము ఏమీ మాట్లాడలేం. ప్రస్తుత ప్రణాళిక ప్రకారం కివీస్తో సిరీస్ ముగిశాక టీమ్ఇండియా వచ్చే నెల 8 లేదా 9న సౌతాఫ్రికాకు బయలుదేరి వెళుతుంది. కరోనా కొత్త వేరియంట్ కారణంగా పలు దేశాలు దక్షిణాఫ్రికా నుంచి వచ్చే ప్రయాణికులపై ఆంక్షలు విధించాయి. ఈ నేపథ్యంలో ప్రభుత్వ నిర్ణయం గురించి మేము ఎదురుచూస్తున్నాం" అని ఓ అధికారి వెల్లడించారు.
అందరిదీ ఆదే దారి..
కొత్త వేరియంట్ కారణంగా దక్షిణాఫ్రికా నుంచి వచ్చే విమాన సర్వీసుల్ని రద్దు చేసింది యూకే. దీంతో బ్రిటన్, ఐరిష్ గోల్ఫ్, రగ్బీ జట్లు హుటాహుటిన వారి దేశాలకు పయనమయ్యాయి. వీరే కాకుండా డీపీ వరల్డ్ టూర్లో పాల్గొనేందుకు వచ్చిన పలు దేశాలు ఇదే బాటపట్టనున్నాయి. అలాగే యూనైటెడ్ రగ్బీ ఛాంపియన్ షిప్ను రెండు వారాలు వాయిదా వేశారు నిర్వాహకులు.
ప్రస్తుతం దక్షిణాఫ్రికా పర్యటనలో ఉన్న నెదర్లాండ్ క్రికెట్ జట్టు కూడా తమ పర్యటనను అర్ధాంతరంగా వాయిదా వేసుకునేందుక సిద్ధమైనట్లు తెలుస్తోంది. ఈ రెండు జట్ల మధ్య నేడు (శుక్రవారం) తొలి వన్డే జరుగుతోంది.
