భారత బ్యాడ్మింటన్ పురుషుల జోడీ సాత్విక్ సాయిరాజ్-చిరాగ్ శెట్టి.. ఇటీవలే చైనా ఓపెన్లో సత్తా చాటారు. సెమీఫైనల్లో పోరాడి ఓడారు. మంగళవారం ప్రారంభమయ్యే హాంకాంగ్ ఓపెన్లో మాత్రం ఈ తప్పు పునరావృతం కాకూడదని భావిస్తున్నారు.
సాత్విక్-చిరాగ్.. పతకం సాధించాలనే పట్టుదలతో ఈ టోర్నీ బరిలో దిగుతున్నారు. తొలి రౌండ్లో జపాన్ ద్వయం టకూరో హోకి-యుగో కొబయాషీతో తలపడనున్నారు.
వీరితో పాటే మహిళల సింగిల్స్ విభాగంలో స్టార్ షట్లర్లు సైనా నెహ్వాల్, పీవీ సింధు.. బరిలో దిగుతున్నారు. గత కొన్ని టోర్నీల్లో వీరు పతకాలు సాధించడంలో విఫలమయ్యారు. చైనా ఓపెన్లో వీరిద్దరూ తొలి రౌండ్లోనే నిష్క్రమించారు.
ఈ టోర్నీ తొలిరౌండ్లో సైనా.. చైనాకు చెందిన కాయ్ యన్ యన్తో, సింధు కొరియాకు చెందిన కిమ్ గ యోన్తో తలపడనున్నారు.
పురుషులు సింగిల్స్ విభాగంలో కిదాంబీ శ్రీకాంత్.. ప్రపంచ నంబర్ వన్ షట్లర్ కెంటో మొమొటోతో తొలి రౌండ్ ఆడనున్నాడు. సాయి ప్రణీత్.. షై యు కీ(చైనా)తో తలపడనున్నాడు.
మహిళల డబుల్స్ విభాగంలో అశ్విని-సిక్కిరెడ్డి, మిక్స్డ్ డబుల్స్ విభాగంలో సాత్విక్-అశ్విని పొన్నప్ప జోడీలు బరిలోకి దిగుతున్నాయి.
