Upcoming sports movies 2022: క్రికెట్‌, ఫుట్‌బాల్‌, బాక్సింగ్‌.. ఆట ఏదైనా భావోద్వేగాలు చక్కగా కుదిరి ప్రేక్షకుణ్ని ఆటలోకి తీసుకెళ్లగలిగితే సినిమా కచ్చితంగా విజయం సాధిస్తుంది. ఈ సూత్రాన్ని పాటిస్తూ ఫుట్‌బాల్‌, క్రికెట్‌, స్నూకర్‌, బాక్సింగ్‌ నేపథ్యంగా పలు చిత్రాలు అలరించడానికి సిద్ధమవుతున్నాయి. అవేంటో చూసేద్దాం..
మైదాన్‌ మెరుపులు
Ajaydevgan Maidan movie: ఫుట్‌బాల్‌ ప్రేమికుల కోసం రానున్న మరో చిత్రం ‘మైదాన్‌’. కోచ్‌ సయ్యద్‌ అబ్దుల్‌ రహీమ్‌ జీవిత ఆధారంగా తెరకెక్కిన ఈ చిత్రంలో అజయ్‌దేవ్‌గణ్‌ ప్రధాన పాత్ర పోషిస్తున్నారు. అమిత్‌ రవీంద్రనాథ్‌ శర్మ దర్శకత్వం వహించిన ఈ చిత్రం గత కొన్ని నెలలుగా వాయిదా పడుతూ వస్తోంది. ఎట్టకేలకు ఈ సినిమాని జూన్‌ 3న విడుదల చేయనున్నారు.
ఫుట్‌బాల్‌ ప్రేమికుల కోసం
ఈ ఏడాది ఫుట్‌బాల్‌ ప్రేమికులకు పండగే. ఎందుకంటే 2022లో ఫుట్‌బాల్‌ నేపథ్యంలో సాగే రెండు చిత్రాలు వస్తున్నాయి. అందులో ఒకటి ‘జుండ్‌’, రెండోది ‘మైదాన్‌’. మన దగ్గర ఫుట్‌బాల నేపథ్యంగా వచ్చిన చిత్రాలు తక్కువనే చెప్పాలి. ఆ లోటును భర్తీ చేసేందుకు ప్రేక్షకుల ముందుకు వస్తోన్న చిత్రం ‘జుండ్‌’. ప్రముఖ నటుడు అమితాబ్‌బచ్చన్‌ ప్రధాన పాత్రలో తెరకెక్కిన చిత్రమిది. మాదక ద్రవ్యాలకు బానిసలైన వీధి బాలలను చేరదీసి వాళ్లని ఫుట్‌బాల్‌ ఆటగాళ్లుగా తీర్చిదిద్దిన విజయ్‌ బర్సే జీవిత కథ స్పూర్తితో ఈ చిత్రం రూపొందింది. రిటైర్డ్‌ టీచర్‌ తనకు ఎన్నో ఇబ్బందులు, అవరోధాలు ఎదురైన తట్టుకొని వీధిబాలల్లో ఫుట్‌బాల్‌ ఆటను ప్రేమించేలా చేసిన తీరు ఈ చిత్రంలో చూపెట్టనున్నారు. నాగరాజ్‌ మంజులే దర్శకత్వం వహించిన ఈ చిత్రం మార్చి 4న రానుంది.
క్రికెటర్‌ జాన్వీ
Janvi kapoor sports movie: క్రికెట్‌ అభిమానుల కోసం వస్తున్న మరో చిత్రం ‘మిస్టర్ అండ్ మిసెస్ మహి’. జాన్వీ కపూర్‌, రాజ్‌కుమార్‌ రావ్‌ ప్రధాన పాత్రల్లో శరణ్‌ శర్మ తెరకెక్కిస్తున్నారు. ధర్మప్రొడక్షన్స్‌ నిర్మిస్తున్న ఈ చిత్రాన్ని అక్టోబరు 7న ప్రేక్షకుల ముందుకు తీసుకురావడానికి సన్నాహాలు చేస్తున్నారు. ‘‘ఒక్కోసారి నీ కలల్ని ఒంటరిగా సాధించేవు...తోడుగా సాధిద్దాం జాన్వీ’’ అంటూ ఈ సినిమా గురించి పంచుకున్నారు రాజ్‌కుమార్‌. గతంలో ఈ దర్శకుడు తీసిన ‘గుంజన్‌ సక్సేనా’లో నటించి ప్రశంసలు అందుకుంది జాన్వీ.
అనుష్క ఎక్స్‌ప్రెస్‌
Anushka chakdaha express: అనుష్కశర్మ కొన్నేళ్ల విరామం తర్వాత మళ్లీ ఎంట్రీ ఇస్తున్న చిత్రం ‘చక్‌దా ఎక్స్‌ప్రెస్‌’. ప్రముఖ భారతీయ మహిళా క్రికెటర్‌ జులన్‌ ఘోస్వామి కథతో ఈ చిత్రం తెరకెక్కుతోంది. ప్రొసిట్‌ రాయ్‌ దర్శకత్వం వహిస్తున్న ఈ సినిమా కోసం అనుష్క ప్రత్యేకంగా సిద్ధమైంది. ఈ సినిమాని నెట్‌ఫ్లిక్స్‌ ద్వారా ప్రేక్షకుల ముందుకు తీసుకురానున్నారు.
లైగర్‌ ఫైట్‌
Vijaydevarkonda Fighter movie: బాక్సింగ్‌ నేపథ్యంగా వచ్చి బాక్సాఫీసుని వసూళ్లతో నింపేసిన ఎన్నో చిత్రాలు ఉన్నాయి. ఇప్పుడు అదే దారిలో రానున్న మరో చిత్రం ‘లైగర్‌’. విజయ్‌ దేవరకొండ నటిస్తున్న పాన్‌ ఇండియా చిత్రమిది. పూరి జగన్నాథ్‌ దర్శకత్వం వహిస్తున్న ఈ చిత్రంలో ప్రముఖ బాక్సర్‌ మైక్‌ టైసన్‌ కీలక పాత్రలో నటిస్తున్నారు. ఈ సినిమా ఆగస్టు 25న విడుదల కానుంది.
వరుణ్ తేజాా గని
మెగాహీరో వరుణ్తేజ్ కథానాయకునిగా నటించిన చిత్రం 'గని' ఫిబ్రవరి 25న ప్రేక్షకుల ముందుకు రానుంది. వరుణ్ ఈ సినిమాలో బాక్సర్‌గా కనిపించారు. సయీ మంజ్రేకర్‌ కథానాయిక. కిరణ్‌ కొర్రపాటి దర్శకత్వం వహిస్తున్నారు. అల్లు బాబీ, సిద్ధు ముద్ద సంయుక్తంగా నిర్మిస్తున్నారు. అల్లు అరవింద్‌ సమర్పకులు. జగపతిబాబు, సునీల్‌ శెట్టి, ఉపేంద్ర, నవీన్‌చంద్ర ఇతర కీలక పాత్రల్లో నటించిన ఈ చిత్రానికి తమన్‌ సంగీతమందించారు.
జెర్సీ సందడి
Shahid kapoor jersy movie: షాహిద్‌కపూర్‌ ఎంతో ఆత్రుతగా ఎదురుచూస్తున్న చిత్రం ‘జెర్సీ’. ‘కబీర్‌సింగ్‌’ భారీ బాక్సాఫీసు విజయం తర్వాత వస్తున్న ఈ చిత్రం క్రికెట్‌ నేపథ్యంతో సాగుతుంది. ఇదే పేరుతో తెలుగులో విజయవంతమైన చిత్రానికి రీమేక్‌గా వస్తోంది. గౌతమ్‌ తిన్ననూరి దర్శకత్వం వహించిన ఏప్రిల్‌ 14న రానుంది.
తులసీదాస్‌ జూనియర్‌
క్రికెట్‌, ఫుట్‌బాల్‌, హాకీ, బాక్సింగ్‌..ఈ క్రీడలపై చాలా సినిమాలొచ్చాయి. వస్తున్నాయి. స్నూకర్‌ ఆటపై సినిమాలు చాలా తక్కువ. ఇప్పుడు ఈ ఆటపై సంజయ్‌ దత్‌ ప్రధాన పాత్రలో రూపుదిద్దుకుంటున్న చిత్రం ‘తులసీదాస్‌ జూనియర్‌’. ఈ చిత్రంలో ఇతర కీలక పాత్రల్లో మాస్టర్‌ వరుణ్ బుద్ధదేవ్‌, రాజీవ్‌ కపూర్‌ నటించారు. మృదుల్‌ మహేంద్ర దర్శకత్వం వహిస్తున్న విడుదలపై ఇంకా స్పష్టత రాలేదు.
ఇదీ చూడండి: తెలుగు హీరోయిన్ను అరెస్ట్ చేసిన ముంబయి పోలీసులు
