కొత్త అందాలకు పట్టుగొమ్మ తెలుగు చిత్రసీమ. ఏటా పదుల సంఖ్యలో కొత్త తారకలు తెలుగు తెరపై తళుక్కుమని మెరుస్తుంటారు. అయితే వాళ్లలో హిట్టు మాట వినిపించి.. స్టార్‌ హీరోలతో జట్టు కట్టే స్థాయికి చేరుకునేది కొద్ది మందే. అందుకే ఎందరు భామలు తెలుగు తెరకు పరిచయమైనా.. స్టార్‌ కథానాయకుల సినిమాలకి నాయికల సమస్య ఎదురవుతూనే ఉంటుంది. ఆ లోటును పూడ్చేందుకే దర్శక నిర్మాతలు అప్పుడప్పుడు పొరుగు చిత్రసీమల వైపు దృష్టి సారిస్తుంటారు. ఆయా భాషల్లోని కొత్త సోయగాల్ని వెతికి పట్టుకొని తెలుగు సినీప్రియులకు పరిచయం చేస్తుంటారు. ఇప్పుడీ బాటలోనే పలువురు పరభాషా భామలు తెలుగు తెరపై మెరిసేందుకు సిద్ధమయ్యారు. మరి వాళ్లెవరు.. వారి సినిమా విశేషాలేంటో తెలుసుకుందాం.
అంటే.. సుందరానికి.. జోడీ
సినిమాల విషయంలో ఎప్పుడూ జోరు చూపిస్తుంటారు కథానాయకుడు నాని. ఏటా ఆయన నుంచి రెండు, మూడు చిత్రాలైనా విడుదలవుతుంటాయి. అందుకే ఆయన సినిమాల్లో కొత్త అందాల సందడి ఎక్కువ కనిపిస్తుంటుంది. ప్రస్తుతం ఆయన హీరోగా వివేక్‌ ఆత్రేయ దర్శకత్వంలో ఓ చిత్రం రూపొందుతోంది. దీనికి 'అంటే.. సుందరానికి' అనే టైటిల్‌ ఖరారు చేశారు. ఇప్పుడీ సినిమాతోనే తెలుగు తెరకు పరిచయం కానుంది మలయాళీ అందం నజ్రియా ఫహాద్‌. తమిళం, మలయాళ భాషల్లో స్టార్‌ నాయికగా మెరుపులు మెరిపిస్తున్న ఈ అమ్మడు.. అనువాద చిత్రం 'రాజా.. రాణి'తో తెలుగు ప్రేక్షకులకు దగ్గరైంది. ఇప్పుడు నానితో జోడీ కట్టి నేరుగా తెలుగు వారిని పలకరించేందుకు సిద్ధమైంది. ప్రస్తుతం ఈ సినిమా చిత్రీకరణ దశలో ఉంది.
నయా అందాల లీల..
కొత్త అందాలకు నెలవులా నిలుస్తుంటాయి దర్శకుడు రాఘవేంద్రరావు చిత్రాలు. దాదాపు 5 దశాబ్దాల సినీ ప్రయాణంలో ఆయన ఎంతో మంది స్టార్‌ నాయికల్ని వెండితెరకు పరిచయం చేశారు. ఇప్పుడాయన నుంచి వస్తోన్న కొత్త చిత్రం 'పెళ్లి సంద..డి'. గతంలో ఆయన నుంచి వచ్చిన 'పెళ్లి సందడి'కి సీక్వెల్‌గా రూపొందిస్తున్న చిత్రమిది. శ్రీకాంత్‌ తనయుడు రోషన్‌ హీరోగా నటిస్తున్నాడు. గౌరీ రోనంకి దర్శకురాలు. ఇప్పుడీ చిత్రంతో శ్రీలీల అనే ఓ కొత్త భామను తెలుగు తెరకు పరిచయం చేస్తున్నారు రాఘవేంద్రరావు. కన్నడలో పలు విజయవంతమైన సినిమాల్లో నటించి ప్రేక్షకులను మెప్పించింది శ్రీలీల. ఇప్పుడీ సినిమాతోనే తెలుగులో అదృష్టాన్ని పరీక్షించుకోనుంది. ఇప్పటికే చిత్రీకరణ పూర్తి చేసుకున్న ఈ సినిమా.. త్వరలో ప్రేక్షకుల ముందుకు రానుంది. ప్రస్తుతం ఈ అమ్మడు తెలుగులో మరో క్రేజీ అవకాశాన్ని దక్కించుకున్నట్లు తెలుస్తోంది. రవితేజ.. త్రినాథరావు నక్కిన దర్శకత్వంలో రూపొందనున్న కొత్త సినిమాలో ఆమె ఓ నాయికగా ఎంపికైందట.
ఏజెంట్‌ సుందరి..
అఖిల్‌ కథానాయకుడిగా సురేందర్‌ రెడ్డి తెరకెక్కిస్తోన్న చిత్రం 'ఏజెంట్‌'. విభిన్నమైన యాక్షన్‌ థ్రిల్లర్‌ కథాంశంతో రూపొందుతోంది. ఇప్పుడీ సినిమాతోనే తెలుగు తెరపైకి అడుగుపెడుతోంది ముంబయి అందం సాక్షి వైద్య. మోడల్‌గా ఇప్పటికే అనేక వాణిజ్య ప్రకటనల్లో కనిపించిన సాక్షికి.. సామాజిక మాధ్యమాల్లో మంచి క్రేజ్‌ ఉంది. తరచూ హాట్‌ హాట్‌ అందాలతో నెట్టింట సందడి చేస్తుంటుంది. ఇప్పుడామె అఖిల్‌ సినిమాతోనే వెండితెరపైకి తొలి అడుగు వేస్తోంది. ఇప్పటికే లాంఛనంగా మొదలైన ఈ చిత్రం.. త్వరలో రెగ్యులర్‌ చిత్రీకరణను ప్రారంభించుకోనుంది.
సొగసుల సంయుక్త..
తమిళం, కన్నడ, మలయాళ భాషల్లో సినీప్రియులను అలరిస్తోన్న నయా అందం సంయుక్త మేనన్. ఇప్పటికే తెలుగు మినహా అన్ని దక్షిణాది చిత్రాల్లోనూ మెరుపులు మెరిపించిన ఈ మలయాళీ అందం.. త్వరలో తెలుగు సినీప్రియుల ముందుకు రానుంది. ప్రస్తుతం సాయితేజ్‌ హీరోగా దేవ్‌ కట్టా దర్శకత్వంలో 'రిపబ్లిక్‌' చిత్రం రూపొందుతోంది. ఇది పూర్తయిన వెంటనే కార్తీక్‌ దండు అనే కొత్త దర్శకుడితో ఓ సినిమా చేయనున్నారు తేజ్‌. ఇందులో ఆయనకు జోడీగా సంయుక్త సందడి చేయనుందని సమాచారం. ఓ విభిన్నమైన మిస్టరీ థ్రిల్లర్‌ కథాంశంతో రూపొందనున్న చిత్రమిది. దర్శకుడు సుకుమార్‌ స్క్రీన్‌ ప్లే అందిస్తున్నారు.
ఐశ్వర్య.. తెలుగులో తొలి అడుగు
'లవ్‌ ఫెయిల్యూర్‌' అనే అనువాద చిత్రంతో తెలుగు ప్రేక్షకులకు పరిచయమైన భామ ఐశ్వర్య మేనన్. తమిళ, కన్నడ, మలయాళ భాషల్లో పలు సినిమాల్లో నటించి ప్రత్యేక గుర్తింపు తెచ్చుకుంది. ఇప్పుడీ భామ రవితేజ కొత్త చిత్రంతో తెలుగులోకి నేరుగా ఎంట్రీ ఇవ్వనుందని సమాచారం. రవితేజ హీరోగా త్రినాథరావు నక్కిన ఓ చిత్రం రూపొందిస్తున్నారు. ఇప్పటికే లాంఛనంగా మొదలైన ఈ సినిమా.. త్వరలో రెగ్యులర్‌ చిత్రీకరణ ప్రారంభించుకోనుంది. ఇందులో ఇద్దరు కథానాయికలకు అవకాశముండగా.. ఓ నాయికగా ఐశ్వర్య మేనన్ పేరును ఖరారు చేసినట్లు వార్తలు వినిపిస్తున్నాయి.
