బాలీవుడ్ హీరో సుశాంత్ సింగ్ రాజ్పుత్ మృతి కేసులో రోజుకో ఆసక్తికర విషయం వెలుగులోకి వస్తోంది. ఇటీవలే సుశాంత్ ఆత్మహత్యకు పాల్పడటానికి రియా చక్రవర్తి కారణమంటూ అతని తండ్రి బిహార్లోని పట్నా పోలీస్ స్టేషన్లో కేసు నమోదు చేశారు. ఈ క్రమంలోనే పోలీసులు విచారణ ప్రారంభించగా.. సుశాంత్ ప్రేయసి రియా సుప్రీం కోర్టును ఆశ్రయించింది. రాజ్పుత్ తండ్రి తనను తప్పుగా కేసులో ఇరికించారని తెలిపింది.
సుశాంత్ మరణంతో కుంగిపోయిన తనను కొంతమంది అత్యాచారం చేసి చంపేస్తామని బెదిరింపులకు పాల్పడినట్లు ధర్మాసనానికి వివరించింది. సుశాంత్ తండ్రి బిహార్లో తన పలుకుబడి ఉపయోగించి కేసును ప్రభావితం చేసే అవకాశం ఉన్నందున.. ముంబయికి కేను బదిలీ చేయాలని విజ్ఞప్తి చేసింది.
సుశాంత్తో తనకున్న బంధాన్ని వివరిస్తూ.. జూన్ 8 వరకు తామిద్దరం సహజీవనం చేశామని తెలిపింది. ఆ సమయంలో సుశాంత్ తీవ్ర మానసిక ఒత్తిడికి లోనయ్యాడని.. వాటిని అధిగమించేందుకు మందులు కూడా వాడేవాడని చెప్పుకొచ్చింది. సుశాంత్ మృతితో తాను తీవ్ర బాధను అనుభవిస్తున్నట్లు తెలిపింది.
