బాలీవుడ్లో బయోపిక్ అంటే మనకు 'ధోని' సినిమా టక్కున గుర్తొస్తుంది. టీమ్ఇండియా మాజీ కెప్టెన్, క్రికెటర్ మహేంద్ర సింగ్ ధోనీ జీవితం ఆధారంగా దీనిని తెరకెక్కించారు. దేశవ్యాప్తంగా ప్రేక్షకాదరణతో పాటు కలెక్షన్లూ సాధించిన ఈ చిత్రం తీసేందుకు ధోనీ.. రూ.45 కోట్లు తీసుకున్నారట. అవును మీరు విన్నది నిజమే. తన జీవితానికి సంబంధించిన రహస్య, కీలక సమాచారాన్ని ఇవ్వాలంటే ఆ మాత్రం ఇవ్వాలని మహీ భావించినట్లు ఉన్నాడు! ఇదే కాకుండా హిందీలోని పలు బయోపిక్ల కోసం పలువురు ప్రముఖులు ఎంతెంత మొత్తం తీసుకున్నారు అనే విషయాలు సమాహారమే ఈ ప్రత్యేక కథనం.
1. ధోనీ (ఎంఎస్ ధోని: ది అన్టోల్డ్ స్టోరీ)
బాలీవుడ్లో తెరకెక్కిన 'ఎంఎస్ ధోని: ది అన్టోల్డ్ స్టోరీ' బయోపిక్ అందరి ప్రశంసలు అందుకుంది. ధోనీ పాత్రలో సుశాంత్ సింగ్ రాజ్పుత్ అద్భుతంగా నటించారు. నటిస్తుంది సుశాంత్ లేదా ధోనీనా అనేంతలా జీవించాడు.
ఈ బయోపిక్లో చిన్ననాటి నుంచి ధోని.. క్రికెట్పై చూపించే ఆసక్తి, ఆ తర్వాత భారతీయ రైల్వేలో ఉద్యోగం చేస్తూ టీమ్ఇండియాలో ఏ విధంగా చోటు సంపాదించుకున్నాడనేది చూపించారు. ధోనీ వ్యక్తిగత జీవితంతో పాటు క్రికెట్ కెరీర్ గురించి స్పష్టంగా చూపించడంలో దర్శకుడు విజయం సాధించాడు. తన బయోపిక్ను నిర్మించడానికి చిత్రబృందం నుంచి ధోని రూ.45 కోట్లను తీసుకున్నాడని ఓ సర్వే తెలిపింది. కానీ ఈ వార్తపై ఇప్పటివరకు ఎలాంటి స్పష్టత రాలేదు!
2. సంజయ్ దత్ (సంజు)
బాలీవుడ్ స్టార్ సంజయ్ దత్ జీవితాధారంగా రూపొందిన చిత్రం 'సంజు'. సంజయ్ దత్ పాత్ర పోషించిన రణ్బీర్ కపూర్కు విమర్శకుల నుంచి మంచి మార్కులే పడ్డాయి. సంజయ్ దత్ వ్యక్తిగత జీవితంతో పాటు ఆయన సినీ ప్రయాణంలో ఎదుర్కొన్న అవరోధాలను కళ్లకు కట్టినట్టు చూపించడంలో దర్శకుడు రాజ్కుమార్ హిరాణీ విజయం సాధించారు. అయితే ఈ బయోపిక్ కోసం తన వ్యక్తిగత సమాచారాన్ని పంచుకున్నందుకుగానూ సంజయ్ దత్ రూ.9 నుంచి 10 కోట్లను తీసుకున్నాడని టైమ్స్ ఆఫ్ ఇండియా తెలిపింది. దీనితో పాటు బాక్సాఫీస్ వద్ద వచ్చిన లాభంలో భాగం కూడా తీసుకున్నాడని స్పష్టం చేసింది.
3. మేరీ కోమ్ (మేరీకోమ్)
భారత బాక్సింగ్ క్రీడాకారిణి మేరీ కోమ్ జీవితాధారంగా రూపొందిన చిత్రం 'మేరీకోమ్'. 2008లో ప్రపంచ బాక్సింగ్ ఛాంపియన్గా నిలిచేంత వరకు ఆమె ఏ విధంగా కష్టపడిందనే విషయాన్ని వెండితెరపై దర్శకుడు ఓమంగ్ కుమార్ చక్కగా చూపించారు. ఇందులో ప్రియాంక చోప్రా టైటిల్ రోల్ చేసింది. తన బయోపిక్ అనుమతి కోసం మేరీకోమ్ రూ.25 లక్షలు తీసుకున్నట్లు ఓ సర్వే తెలిపింది. ఈ సినిమాకు ఉత్తమ ఆదరణ పొందిన సినిమా విభాగంలో జాతీయ అవార్డు దక్కింది.
4. పాన్ సింగ్ తోమర్ (పాన్ సింగ్ తోమర్)
బాలీవుడ్ నటుడు ఇర్ఫాన్ఖాన్ నటించిన అత్యుత్తమ చిత్రాల్లో ఇదొకటి. పాన్ సింగ్ తోమర్ వ్యక్తిగత జీవితంతో పాటు జాతీయ స్థాయి అథ్లెట్గా ఎదగడం, చంబల్ వ్యాలీలో అత్యంత అపఖ్యాతి పొందిన దొంగగా ఎలా మారాడన్నదే ఈ చిత్ర కథాంశం. ఈ బయోపిక్ కోసం పాన్ సింగ్ తోమర్ రూ.15 లక్షలు తీసుకున్నట్లు మిడ్-డే సర్వే తెలిపింది. అయితే హిందూస్థాన్ టైమ్స్ ప్రకారం.. ఈ చిత్ర దర్శకుడిపై తోమర్ మేనల్లుడు టిగ్మాన్ష్ ధులియా కేసు నమోదు పెట్టాడట. సినిమా తీసేందుకుగానూ దర్శకుడు, రూ.40 లక్షలు పూర్తిగా చెల్లించలేదని ధులియా ఆరోపించాడు.
5. లక్ష్మీ అగర్వాల్ (ఛపాక్)
యాసిడ్ దాడి బాధితురాలైన లక్ష్మీ అగర్వాల్.. తన జీవితాధారంగా సినిమాను రూపొందించేందుకు చిత్రబృందం నుంచి రూ.13 లక్షలను తీసుకుందని ఫ్రీ ప్రెస్ జర్నల్ సర్వే వెల్లడించింది. మాలతి అని యువతి.. తనపై యాసిడ్ దాడి జరిగిన తర్వాత న్యాయం కోసం పోరాడటం సహా ఇతర యాసిడ్ బాధితురాళ్లకు మద్దతుగా న్యాయపోరాటం చేసి భారతదేశంలో యాసిడ్ అమ్మకాల విషయంలో మార్పులు తీసుకొచ్చింది.
6. మిల్కా సింగ్ (భాగ్ మిల్కా భాగ్)
మిల్కా సింగ్ను ఫ్లయింగ్ సిక్కు అని కూడా పిలుస్తారు. అతడు తన బయోపిక్ కోసం కేవలం ఒక రూపాయే వసూలు చేశాడని వెల్లడైంది. ఇందులో ఫర్హాన్ అక్తర్, సోనమ్ కపూర్లు ప్రధానపాత్రల్లో నటించారు. హిందూస్థాన్ టైమ్స్ నివేదిక ప్రకారం మిల్కా సింగ్ మాత్రమే కాకుండా మిగిలిన నటీనటులూ అతి తక్కువ పారితోషికాన్ని తీసుకున్నట్లు తెలుస్తోంది. ఈ సినిమాలోని పాత్ర కోసం సోనమ్ కపూర్ 11 రూపాయలు రెమ్యూనరేషన్ తీసుకుంది. మిల్కా సింగ్ పాత్రలో నటించిన ఫర్హాన్ అక్తర్.. "వంద మీటర్ల పరుగు కోసం 11.4 సెకన్లను తీసుకున్నా" అని వెల్లడించాడు. ఒలింపిక్స్లో మిల్కా సింగ్ పరుగు పూర్తి చేసిన సమయమిది.
7. దంగల్(మహావీర్ సింగ్ ఫొగాట్)
కుస్తీ పోటీల నేపథ్య కథతో బాలీవుడ్లో రూపొందిన చిత్రం 'దంగల్'. తన కుమార్తెలను మల్లయోధులుగా తయారు చేసి, అంతర్జాతీయ స్థాయిలో పతకాలు సాధించేలా చేసిన మహవీర్ సింగ్ ఫొగాట్ ప్రయాణమే ఈ సినిమా. ప్రపంచవ్యాప్తంగా ప్రేక్షకుల్ని ఆకట్టుకున్న సినిమా.. రూ.2000 కోట్ల వసూళ్లు సాధించింది. మహావీర్ పాత్రలో ఆమిర్ మెప్పించారు. అయితే ఈ సినిమా హక్కుల కోసం మహావీర్ సింగ్ ఫొగాట్ రూ.80 లక్షలు తీసుకున్నారట.
