Aliabhatt Gangubai Kathiawadi: "నా జీవితంలో కామాఠిపురను ఎప్పుడూ చూడలేదు. ముంబయిలోని ఫిల్మ్‌సిటీలో వేసిన కామాఠిపుర సెట్‌ నాకు తెలుసు. అక్కడికి వెళ్లగానే నాలో మరో మనిషి బయటకొచ్చేది. కొన్నిసార్లు ఇంట్లో తెలియకుండానే గంగూబాయ్‌లా కూర్చునేదాన్ని, తనలాగే మాట్లాడేదాన్ని. ఆ పాత్ర కోసం నేను గంగూ ప్రపంచంలోకే వెళ్లిపోయా" అంటోంది కథానాయిక అలియాభట్‌. ఆమె ప్రధాన పాత్రధారిగా, సంజయ్‌ లీలా భన్సాలీ దర్శకనిర్మాణంలో తెరకెక్కిన చిత్రం 'గంగూబాయ్ కథియావాడి'. ఈ నెల 25న ప్రేక్షకుల ముందుకొస్తోంది. ఈ సందర్భంగా అలియా ఈ సినిమా ప్రయాణంలో తన అనుభవాల్ని పంచుకొంది.
"మూడేళ్లుగా ఒకే పాత్రతో ప్రయాణం చేశాను. ఒక నటిగా నాకు ఇదో అరుదైన అనుభవం. చూసిన ప్రేక్షకులంతా ఆ పాత్రతో ప్రేమలో పడతారు. గంగూబాయ్ తన చుట్టూ నెలకొన్న పరిస్థితుల్ని ఎలా ఎదురించింది? బలమైన శక్తిగా ఎలా ఎదిగిందనేది ఆసక్తికరం".
"ఈ సినిమా ప్రయాణంలో ఎన్నో మార్పు చేర్పులు. ఎప్పుడు ఏ రకమైన మార్పు ఉంటుందో ఊహకు అందేది కాదు. ఒక సినిమాలో నటించే విషయంలో ప్రతి ఒక్కరికీ కొన్ని పద్ధతులు ఉంటాయి. ఆ పద్ధతులన్నిటినీ సమూలంగా మార్చేసిన చిత్రమిది. ఒక సన్నివేశం చేయడానికి రకరకాల పద్ధతలు ఉంటాయనే విషయం ఈ సినిమాతో తెలిసింది. అజయ్ దేవగణ్ నుంచి చాలా విషయాలు తెలుసుకున్నా".
"పాన్ ఇండియా నటి కావాలనేది నా కల. ఆ విషయంలో శ్రీదేవి నాకు స్ఫూర్తి. ఆమె తెలుగు, తమిళం, హిందీ... ఇలా ఏ భాషలో తీసుకున్నా స్టార్‌గానే వెలిగారు. భాషతో సంబంధం లేకుండా అలా పేరు తెచ్చుకోవాలనేదే నా కోరిక. అలాగని నేనేమీ ప్రణాళికలు వేసుకుని 'ఆర్‌.ఆర్‌.ఆర్‌', 'గంగూబాయ్...' చేయలేదు. అలా కుదిరాయంతే. తెలుగులో నా ప్రయాణం ఇలా కొనసాగాలని ఆశ పడుతున్నా".
ఇదీ చూడండి: Telugu title movies: వెండితెరపై 'తెలుగు' వెలుగులు
