లాక్డౌన్ వల్ల ప్రజలందరూ బలవంతంగా విరామం తీసుకోవాల్సి వచ్చింది. ఈ నేపథ్యంలో ఇంటికే పరిమితమైన పలువురు సెలబ్రిటీలు.. తమకు నచ్చిన వ్యాపకాలతో సమయాన్ని గడిపారు. కొందరు స్టార్స్ మాత్రం ఈ సమయాన్ని ఫిట్నెస్ మెరుగుపరుచుకోవడంపై దృష్టి పెట్టారు. జిమ్లో కసరత్తులు చేసి చాలా బరువు తగ్గారు. అలాంటి వారెవరో తెలుసుకుందాం.
గణేశ్ ఆచార్య
బాలీవుడ్ కొరియోగ్రాఫర్గా గుర్తింపు తెచ్చుకున్న గణేశ్ ఆచార్య.. లాక్డౌన్లో ఏకంగా 98 కిలోల బరువు తగ్గినట్లు ఓ ఇంటర్వ్యూలో వెల్లడించారు. గతంలో 200 కిలోల బరువున్న ఈయన.. కొన్ని నెలలుగా క్రమం తప్పకుండా జిమ్ చేస్తున్నట్లు తెలిపారు. లాక్డౌన్ విరామంతో పూర్తిగా కసరత్తులపైనే దృష్టిపెట్టి ఫలితం పొందినట్లు తెలిపారు. 2015లో తాను నటించిన 'హే బ్రో' చిత్రం కోసం ఏకంగా 30-40 కిలోలు తగ్గినట్లు గుర్తుచేసుకున్నారు.
విద్యుల్లేఖ రామన్
లాక్డౌన్లో బాగా బరువు తగ్గిన హాస్యనటి విద్యుల్లేఖ రామన్.. తన ఫొటోలు పోస్ట్ చేయగా, నెటిజన్లు ఒక్కసారిగా ఆశ్చర్యపోయారు. బరువు విషయంలో తాను ఎదుర్కొన్న విమర్శలను సవాలుగా తీసుకుని, వర్కౌట్లు చేసిన ఈమె బరువు తగ్గింరట. జూన్ నాటికే తాను 68 కిలోలకు చేరుకున్నానని తెలిపారు.
ఫర్దీన్ ఖాన్
25 ఏళ్ల కుర్రవాడిగా కనిపించాలనే ఉద్దేశంతోనే తాను బరువు తగ్గానని బాలీవుడ్ నటుడు ఫర్దీన్ ఖాన్ చెప్పారు. ఆరు నెలల్లో 18 కిలోల బరువు కోల్పోయి ఫిట్గా కనిపిస్తున్నారు. గతంలో చాలా బరువు ఉండే ఫర్దీన్.. ఇలా వెయిట్ లాస్ అవ్వడంపై రకరకాల ఊహాగానాలు వినిపిస్తున్నాయి. ఫర్దీన్ ఖాన్ తిరిగి సినిమాల్లో నటించనున్నారని బాలీవుడ్లో గుసగుసలు వినిపిస్తున్నాయి.
అర్షద్ వార్సీ
'మున్నాభాయ్ ఎంబీబీఎస్' సినిమాలో సంజయ్ దత్ పక్కన నటించిన అర్షద్ వార్సీ.. దక్షిణాది ప్రేక్షకులకూ సుపరిచితమే. లాక్డౌన్ విరామ సమయంలో ఫిట్నెస్పై దృష్టిపెట్టి.. 30 రోజుల్లో 6 కిలోల బరువు తగ్గినట్లు ఓ ఇంటర్వ్యూలో వెల్లడించారు. ఇటీవల విడుదలైన హిందీ సినిమా 'దుర్గామతి'లో కీలకపాత్ర పోషించారు అర్షద్.
అవికా గోర్
'చిన్నారి పెళ్లికూతురు' ధారావాహికతో తెలుగు ప్రేక్షకులకు పరిచయమైన అవికా గోర్.. 'ఉయ్యాల జంపాల' సినిమాతో హీరోయిన్గా ఎంట్రీ ఇచ్చారు. ఆ తర్వాత ఆమె చాలా చిత్రాల్లో బొద్దుగా కనిపించారు. గతేడాది తనకు దొరికిన విరామ సమయంలో 13 కిలోలకు పైగా బరువు తగ్గారు అవికా. ఇటీవలే కొన్ని ఫొటోలను సోషల్మీడియాలో పోస్ట్ చేయగా... అవి వైరల్గా మారాయి.
ఇదీ చూడండి: ఉత్తమ నటుడు 'ఏజెంట్ ఆత్రేయ'.. ఉత్తమ చిత్రం 'జెర్సీ'
