గత ఏడాది భారత్ టిక్టాక్ను బ్యాన్ చేసిన తర్వాత.. ఇతర సామాజిక మాధ్యమ సంస్థలు ఆ మార్కెట్ను అందిపుచ్చుకునే పనిలో పడ్డాయి. ఈ రేసులో ఫేస్బుక్కు చెందిన ఇన్స్టాగ్రామ్ ముందు వరుసలో ఉందని చెప్పాలి. ఇందులో భాగంగా టిక్టాక్లానే షార్ట్ వీడియోలను వివిధ గ్రాఫిక్స్, సౌండ్ ఎఫెక్ట్లతో క్రియేట్ చేసేందుకు వీలుగా.. రీల్స్ అనే ఫీచర్ను ప్రవేశపెట్టింది ఇన్స్టాగ్రామ్.
తాజాగా.. యూజర్లు ఇప్పుడు రీల్స్ చేస్తూ డబ్బులు సంపాదించేందుకు వీలుగా.. 'బోనస్' అనే ఫీచర్ను తీసుకువచ్చేందుకు ఇన్స్టా కసరత్తు చేస్తున్నట్లు తెలుస్తోంది. అలెసాండ్రో పలుజ్జీ అనే ఆండ్రాయిడ్ డెవలపర్ ఈ విషయాన్ని వెల్లడించారు. దీనికి సంబంధించి ఓ స్క్రీన్షాట్ను ట్విట్టర్లో పోస్ట్ చేశారు. ఇటీవలే గూగుల్కు చెందిన యూట్యూబ్ కూడా.. షార్ట్స్ వీడియో క్రియేటర్లకు 100 మిలియన్ డాలర్లు ఇవ్వనున్నట్లు ప్రకటించడం గమనార్హం.
వారికి మాత్రమే ఈ ఫీచర్?
స్క్రీన్ షాట్లో ఉన్న వివరాల ప్రకారం.. క్రియేటర్లు కొత్త వీడియో అప్లోడ్ చేస్తే.. వారికి డబ్బులు చెల్లించనుంది ఇన్స్టా. మానిటైజేషన్ చేసి వీడియోలను క్రియేటర్లు ఎప్పటికపక్పుడు సమీక్షించుకునే అవకాశం కూడా ఇందులో ఉండనుంది. అయితే ఎలాంటి క్రియేటర్లకు ఈ బోనస్ ఫీచర్ అందుబాటులో ఉంటుందని అనే విషయంపై ఇంకా స్పష్టత లేదు. ఎక్కువ మంది ఫాలోవర్లు, తరచు వీడియోలు చేసే వారికి మాత్రమే ఈ ఫీచర్ అందుబాటులో ఉంటుందని టెక్ వర్గాల్లో ఊహాగానాలు వస్తున్నాయి.
అయితే ఈ బోనస్ ఫీచర్ ఇంకా అభివృద్ధి దశలో ఉందని తెలుస్తోంది. దీనిపై ఇన్స్టా అధికారిక ప్రకటన కూడా చేయాల్సి ఉంది. ఆ తర్వాతే ఈ ఫీచర్ ఎవరికి అందుబాటులో ఉంటుంది? అనే విషయంపై కూడా క్లారీటీ వస్తుంది.
ఇదీ చదవండి:VPN: నెట్టింట సేఫ్గా విహరించండిలా..
