ఎగ్, చికెన్​తో కాదు - ఓసారి ఇలా "మిల్లెట్ నూడుల్స్" చేయండి! - రుచితో పాటు ఆరోగ్యం బోనస్!

ఎప్పుడూ ఎగ్, చికెన్ నూడుల్స్ బోర్ - ఓసారి ఇలా సరికొత్త స్టైల్​లో ట్రై చేయండి!

Millet Noodles Recipe in Telugu : నూడుల్స్‌ అంటే ఇష్టపడనివాళ్లు దాదాపుగా ఉండరు. పిల్లలకైతే ఆ పేరు నాలుక అంచుల మీదే ఉంటుంది. వేరే టిఫిన్లకు మారాలూ, పేచీలూ ఉంటాయి కానీ.. ఇది మాత్రం అందుకు మినహాయింపే! అందరికీ అంతగా నచ్చేసే నూడుల్స్‌ ఎప్పుడూ ఒకే స్టైల్​లో కాకుండా ఈసారి కాస్త వెరైటీగా ప్రయత్నించండి. అదే.. "మిల్లెట్ నూడుల్స్". టేస్ట్ కూడా చాలా బాగుంటుంది. పైగా ఆరోగ్యానికి మేలు చేస్తుంది! ఈ రెసిపీని చాలా తక్కువ సమయంలో ఈజీగా ప్రిపేర్ చేసుకోవచ్చు. మరి, అందుకు కావాల్సిన పదార్థాలేంటి? ఎలా తయారు చేసుకోవాలి? అనే వివరాలు ఇప్పుడు చూద్దాం.

కావాల్సిన పదార్థాలు :

• జొన్న పిండి - 75 గ్రాములు(అర కప్పు)
• పెసరపప్పు పిండి - 30 గ్రాములు
• ఉప్పు - రుచికి సరిపడా
• నూనె - తగినంత
• సన్నని వెల్లుల్లి తరుగు - 1 టీస్పూన్
• సన్నని క్యాప్సికం ముక్కలు - 30 గ్రాములు
• ఉల్లిపాయ తరుగు - 30 గ్రాములు
• క్యాబేజీ తరుగు - 50 గ్రాములు
• క్యారెట్ తరుగు - 50 గ్రాములు
• సన్నని బీన్స్ తరుగు - 50 గ్రాములు
• మిరియాల పొడి - రుచికి సరిపడా
• మసాలా పొడి - కొద్దిగా
• సోయా సాస్ - పావుటీస్పూన్
• స్ప్రింగ్ ఆనియన్స్ తరుగు - కొద్దిగా

తయారీ విధానం :

• ముందుగా ఒక మిక్సింగ్ బౌల్​లో జొన్నపిండి, పెసర పిండి వేసుకొని చక్కగా మిక్స్ చేసుకోవాలి.
• ఇప్పుడు స్టౌపై ఒక గిన్నె పెట్టుకొని అరకప్పు వాటర్, చిటికెడు ఉప్పు వేసుకొని మరిగించుకోవాలి.
• వాటర్ మరిగాయనుకున్నాక అందులో ముందుగా కలిపి పెట్టుకున్న జొన్నపిండి మిశ్రమాన్ని వేసుకొని లో ఫ్లేమ్ మీద బాగా కలిపి దింపుకోవాలి.
• ఆపై పిండి కాస్త చల్లారాక చేతితో చపాతీ పిండి మాదిరిగా బాగా కలిపి దానిపై కాస్త ఆయిల్ అప్లై చేసి మూతపెట్టి గంటన్నర నుంచి 2 గంటలపాటు అలా వదిలేయాలి.
• అనంతరం పిండిని మరోసారి సాఫ్ట్​గా కలుపుకోవాలి. ఇప్పుడు మురుకుల గొట్టం తీసుకొని అందులో నూడుల్స్ మాదిరిగా వచ్చే సన్నని అచ్చును ఉంచి లోపల ఆయిల్ అప్లై చేసుకోవాలి.
• ఆపై దానిలో కలిపి పెట్టుకున్న పిండిని ఉంచాలి. ఇప్పుడు ఒక పొడవాటి ప్లేట్ తీసుకొని దానిపై కాస్త ఆయిల్ అప్లై చేసుకోవాలి. అనంతరం మురుకుల గొట్టం తీసుకొని లైన్​గా నూడుల్స్​ని వత్తుకోవాలి.
• తర్వాత వత్తుకున్న నూడుల్స్​పై కొద్దిగా నూనె రాసుకొని స్టీమర్​లో పెట్టి పావుగంట పాటు ఉడికించుకోవాలి. స్టీమర్ లేనివారు స్టౌపై పెద్ద గిన్నెలో స్టాండ్ ఉంచి దానిపై నూడుల్స్ వత్తుకున్న ప్లేట్​ ఉంచి అవి మంచిగా ఉడికే వరకు స్టీమ్ చేసుకున్నా సరిపోతుంది.
• ఆవిధంగా ఉడికించుకున్నాక నూడుల్స్​ని బయటకు తీసి మరోసారి వాటిపై కొద్దిగా నూనె అప్లై చేసుకొని చలార్చుకోవాలి. అదేవిధంగా రెసిపీలోకి కావాల్సిన ఉల్లిపాయ, క్యారెట్, క్యాప్సికం, క్యాబేజీ, బీన్స్​ని పొడవుగా, సన్నని ముక్కలుగా కట్ చేసుకొని పక్కనుంచాలి.
• ఇప్పుడు స్టౌపై పాన్ పెట్టుకొని కొద్దిగా ఆయిల్ వేసుకోవాలి. నూనె కాస్త వేడయ్యాక వెల్లుల్లి తరుగు వేసి వేయించుకోవాలి. అవి వేగాక ముందుగా కట్ చేసి పెట్టుకున్న ఉల్లిపాయ, క్యాబేజీ, క్యారెట్, క్యాప్సికం, బీన్స్ స్లైసెస్ వేసుకొని మీడియం ఫ్లేమ్ మీద 2 నుంచి 3 నిమిషాల పాటు ఫ్రై చేసుకోవాలి.
• ఆవిధంగా వేయించుకున్నాక అందులో ముందుగా ప్రిపేర్ చేసుకున్న నూడుల్స్ వేసుకొని ఒకసారి చక్కగా కలుపుకోవాలి.
• ఆ తర్వాత ఉప్పు, మిరియాల పొడి, మసాలా పొడి, సోయా సాస్ యాడ్ చేసుకొని ఎగరేస్తూ కాసేపు వేయించాలి. ఆఖర్లో స్ప్రింగ్ ఆనియన్స్ తరుగు వేసుకొని కలిపి దింపేసుకుంటే చాలు. అంతే.. ఎంతో రుచికరంగా ఉండే "మిల్లెట్ నూడుల్స్" రెడీ!

ఇవీ చదవండి :