చైనా పని పడతానంటూ మొదటి నుంచీ హుంకరిస్తున్న అమెరికా అధ్యక్షుడు డొనాల్డ్ ట్రంప్ ఆ మధ్య టిక్టాక్ను నిషేధించబోతున్నట్లు ప్రకటించారు. తమ దేశ డిజిటల్‌ మార్కెట్‌లోకి విదేశీ సంస్థలను అనుమతించకుండా- తాను మాత్రం ప్రపంచ మార్కెట్‌లోకి దూసుకుపోతున్న చైనాకు, ట్రంప్ కళ్లెం బిగిస్తారని చాలామంది ఆశించారు.
అన్ని దేశాలూ ఇచ్చిపుచ్చుకొనే వైఖరితో స్వేచ్ఛగా ఇంటర్నెట్‌ను నిర్వహించాలని, దీనికి భిన్నంగా వ్యవహరిస్తున్న చైనాను దారికి తీసుకురావాలని అందరి అభిప్రాయం. కానీ, ఒన్‌ బెల్ట్‌ ఒన్‌ రోడ్‌, సముద్ర సిల్క్‌ రూట్‌ లతోపాటు డిజిటల్‌ సిల్క్‌ రూట్‌ లతో ప్రపంచంలో అగ్ర ఆర్థిక శక్తిగా అవతరించాలనుకుంటున్న చైనా వ్యూహం వేరు. ఆ వ్యూహంలో టిక్టాక్ యాప్‌ ఒక కీలక అంతర్బాగం. ఈ యాప్‌ను కనుక అమెరికా నిషేధించి ఉంటే- చైనాకు 10,000 కోట్ల డాలర్ల (రూ.7లక్షల కోట్లకు పైగా) నష్టం వాటిల్లేది.
చైనాకు కత్తీ డాలుగా అమెరికా కంపెనీలు
చైనా యాప్‌ టిక్‌టాక్‌వల్ల అమెరికా జాతీయ భద్రతకు ప్రమాదమంటూ ట్రంప్ ఆగస్టు 6న నిషేధం విధించారు. తరవాత ఆగస్టు 14న జారీ చేసిన ఉత్తర్వులో టిక్టాక్ అమెరికాలో తన వ్యాపారాన్ని నవంబరు 12లోగా స్థానిక సంస్థలకు విక్రయించాలని, లేకుంటే తమ దేశం నుంచి నిష్క్రమించాలని షరతు విధించారు.
సెప్టెంబరు 20లోగా గూగుల్‌, ఆపిల్‌ యాప్‌ స్టోర్ల నుంచి టిక్టాక్ను తొలగించాలని ఆదేశించారు. ఇంతలో సెప్టెంబరు 19న టిక్టాక్ అమెరికన్‌ కంపెనీలు ఒరాకిల్‌, వాల్‌మార్ట్‌లతో కలిసి టిక్టాక్ గ్లోబల్‌ అనే నూతన సంస్థగా ఏర్పడతాయని ప్రకటన వెలువడింది. అమెరికా నుంచి కార్యకలాపాలు నడిపే ఆ సంస్థలో ఒరాకిల్‌, వాల్‌మార్ట్‌లకు చెరి 20శాతం వాటాలు ఉంటాయి. ఈ ఒప్పందం ఖరారు కావడానికి వ్యవధి ఇస్తూ, టిక్టాక్ డౌన్‌లోడ్‌లపై నిషేధాన్ని సెప్టెంబరు 27 వరకు పొడిగించారు. దీనిపై టిక్టాక్ కోర్టుకు వెళ్లగా, డౌన్‌లోడ్‌లపై నిషేధాన్ని జడ్జి తాత్కాలికంగా వాయిదా వేశారు. టిక్టాక్ను అమెరికన్‌ సంస్థలకు విక్రయించాలనే షరతును నవంబరు 12లోగా నెరవేర్చకపోతే మాత్రం టిక్టాక్ ఇక అమెరికా నుంచి నిష్క్రమించాల్సిందే.
ఇంతలో, టిక్టాక్ విక్రయ ఒప్పందం చిక్కులో పడినట్లుంది. టిక్టాక్ మాతృ సంస్థ అయిన బైట్‌ డాన్స్‌కు ఈ యాప్‌లో 80శాతం వాటా ఉంది. అమెరికా కేంద్రంగా ఏర్పడే కొత్త కంపెనీ టిక్టాక్ గ్లోబల్‌లో చెరి 20శాతం వాటా ఉన్న ఒరాకిల్‌, వాల్‌మార్ట్‌లు కొత్త సంస్థలో బైట్‌ డాన్స్‌కు ప్రమేయం ఉండరాదంటున్నాయి.
అమెరికన్‌ వెంచర్‌ పెట్టుబడి సంస్థలు సెకోయియా, జనరల్‌ అట్లాంటిక్‌ భాగస్వాములకు బైట్‌ డాన్స్‌లో 40శాతం వాటా ఉంది. ఒరాకిల్‌, వాల్‌మార్ట్‌ వాటాలతో కలిపితే, టిక్టాక్ గ్లోబల్‌లో అమెరికన్‌ కంపెనీలకే మెజారిటీ వాటా లభించినట్లవుతుంది. అమెరికాలో ఈ సంస్థ సర్వర్లను ఒరాకిల్‌ నిర్వహిస్తుంది. ట్రంప్ నిషేధంవల్ల తమ పెట్టుబడులు దెబ్బతినకుండా చూసుకోవడానికి వెంచర్‌ పెట్టుబడిదారులు వాషింగ్టన్‌లో పెద్దయెత్తున పైరవీలు చేస్తున్నారు.
నవంబరు 3న అధ్యక్ష ఎన్నికలు జరగనున్న దృష్ట్యా అమెరికా ప్రభుత్వం ఇప్పుడప్పుడే టిక్‌టాక్‌పై గట్టి నిర్ణయం తీసుకోగల స్థితిలో లేదు. ఇది టిక్‌టాక్‌కు వాటంగా ఉంది. అమెరికాలో ఈ యాప్‌ను ఉపయోగించే 10కోట్ల మందిలో సగం 20-39 ఏళ్ల ప్రాయంవారే. ఎన్నికల్లో జయాపజయాలను నిర్ణయించే శక్తి గల వినియోగదారులు టెక్సస్‌లో కోటిమంది, ఫ్లోరిడాలో 70 లక్షలమంది ఉన్నారు. టిక్టాక్ నిషేధం ఈ యువ ఓటర్లకు రుచించకపోవచ్చు కూడా.
అదలా ఉంచితే, ఫేస్‌బుక్‌, గూగుల్‌, నెట్‌ ఫ్లిక్స్‌ వంటి అమెరికన్‌ దిగ్గజాలను చైనాలోకి అడుగుపెట్టడానికి అనుమతించకుండానే, తమ టిక్టాక్ యాప్‌ను మాత్రం అమెరికాలో కొనసాగించడానికి బీజింగ్‌ తగు ప్రాతిపదికను ఏర్పరచుకుంటోంది. టిక్టాక్ అల్గొరిథమ్స్‌ను బైట్‌ డాన్స్‌ ఏ అమెరికన్‌ కంపెనీకీ ఇవ్వకుండా తనవద్దనే అట్టిపెట్టుకొంటుంది. ఫలితంగా అంతర్జాతీయ వినియోగదారుల డేటాను చోరీ చేయడాన్ని యథేచ్ఛగా కొనసాగించవచ్చు. చైనా కంపెనీలు తమ డేటాను ప్రభుత్వంతో పంచుకోవాలనే చట్టం ఉందనే సంగతి ఇక్కడ గమనించాలి.
పోరు నష్టం... పొందు లాభం!
చైనా యాప్‌లలో ఉండే బగ్‌ డోర్స్‌ లేదా బ్యాక్‌ డోర్స్‌ వినియోగదారుల డేటా చౌర్యానికి ప్రసిద్ధి. ఇంతా చేస్తూ- అమెరికా ప్రభుత్వానికి ఎన్నికల సందర్భంగా కొన్ని తాయిలాలు ఇవ్వడం ద్వారా టిక్టాక్ తన మార్గాన్ని సుగమం చేసుకొంటోంది. ఇప్పటివరకు అమెరికాలో 1,000 ఉద్యోగాలు సృష్టించిన టిక్టాక్, అమెరికా భాగస్వాములతో కలిసి ఏర్పాటు చేసే టిక్టాక్ గ్లోబల్‌ ద్వారా మరో 25,000 ఉద్యోగాలు కల్పించనున్నట్లు ఆశపెట్టింది.
అమెరికాలో కంటెంట్‌ సృష్టికి 200 మిలియన్‌ డాలర్ల పెట్టుబడి పెట్టి, ఆ కంటెంట్‌ పర్యవేక్షణకు లాస్‌ఏంజెల్స్‌లో పారదర్శకతా కేంద్రాన్ని ఏర్పాటు చేస్తాననీ మాట ఇచ్చింది.
జాతీయతావాదంలో చైనాకూ సొంత విధానం ఉంది. చైనా కంపెనీలను అమెరికా నిషేధిస్తే, అది బృహత్తర చైనా మార్కెట్‌లో వ్యాపారం చేస్తున్న ప్రాక్టర్‌ అండ్‌ గేంబుల్‌, స్టార్‌ బక్స్‌, హాలీవుడ్‌ స్టూడియోలపై వేటుకు దారితీయవచ్చు. సిస్కో అమెజాన్‌ ఏడబ్ల్యూఎస్‌, మైక్రోసాఫ్ట్‌ కంపెనీలు భారీగా ఆదాయం కోల్పోతాయి. ఈ పరిస్థితిని అమెరికాలో పగ్గాలు చేపట్టే కొత్త ప్రభుత్వం ఎలా ఎదుర్కొంటుందో చూడాలి. అక్కడ ఏ ప్రభుత్వమైనా తమ కంపెనీల బాగునే చూసుకొంటుంది.
టిక్టాక్ను భారత్‌ నిషేధించినా, రేపు చైనాతో కలిసి అమెరికా కంపెనీలు ఏర్పాటు చేసే టిక్టాక్ గ్లోబల్‌ భారత్‌లో ప్రవేశించడానికి తప్పక ప్రయత్నిస్తుంది. అది భారత్‌, అమెరికాల మధ్య వాణిజ్య ఘర్షణ ఏర్పడకుండా జాగ్రత్తపడాలి. భారత ప్రభుత్వం నిషేధించిన పబ్జీ కూడా ఏదైనా భారతీయ కార్పొరేట్‌ సంస్థ భాగస్వామ్యంతో తిరిగి మన దేశంలో ప్రవేశించాలని చూస్తోంది. చైనా ఎత్తులకు లాఘవంగా పైయెత్తులు వేస్తూ మన ప్రయోజనాలను కాపాడుకోవాలి.
- ఆర్య
ఇదీ చూడండి: 'ఆ డీల్ కుదరకుంటే.. టిక్టాక్ నిషేధం తప్పదు'
