కీలక రంగాలన్నింటా స్వావలంబన సాధించాలన్న ధ్యేయంతో మోదీ ప్రభుత్వం 'ఆత్మనిర్భర్ భారత్' వ్యూహాన్ని ప్రకటించింది. ప్రపంచానికే ఔషధశాలగా ఎదగాలనుకొంటున్న ఇండియా- ముడిరసాయన ఔషధాల్లో 84శాతం దాకా, ఒక్కచైనా నుంచే 60 శాతానికి పైగా దిగుమతులపై ఆధారపడుతుండటం కలవరకారకమవుతోంది. రెండు దశాబ్దాల క్రితం దాకా ముడి ఔషధాల(యాక్టివ్‌ ఫార్మా ఇన్‌గ్రెడియంట్స్‌- ఏపీఐల) తయారీలో దేశీయంగానే రాణించిన ఇండియా- ఆ రంగంలో చైనా దూకుడుకు తలొగ్గి చౌక దిగుమతులకు అలవాటు పడిపోయింది. ఆస్పిరిన్‌, క్రోసిన్‌ లాంటి మందుల ముడిఔషధాలకూ దిగుమతులే దిక్కుకాగా, ఇండియా పరాధీనత గత కొన్నేళ్లలో 23శాతం పెరిగిందని నిరుడు నవంబరులో కేంద్రమే పార్లమెంటుకు నివేదించింది.
నూరుపాళ్లు నిజమైంది
జనారోగ్య భద్రతతో ముడివడిన అంశంలో చైనాపై అతిగా ఆధారపడటం ఏదో ఒకనాడు ఇక్కట్లలోకి నెట్టేదేనన్న జాతీయ భద్రతా సలహాదారు అజిత్‌ దోభాల్‌ భవిష్యద్దర్శనం- నూరుపాళ్లు నిజంగా రుజువవుతున్న రోజులివి. సరిహద్దు మీరిన చైనా దురాగతాన్ని సమర్థంగా తిప్పికొట్టిన ఇండియా- 'మేడిన్ చైనా' వస్తూత్పత్తులు, కాంట్రాక్టులపై కఠిన వైఖరి చూపాలనే నిర్ణయించింది. రాఖీలు, ఆటబొమ్మల్ని వద్దనుకోగలంగాని, ముడిఔషధాల దిగుమతుల్ని ఇప్పటికిప్పుడు కాదనుకొనే పరిస్థితి ఎక్కడుంది? ఆ మౌలికాంశాన్నే క్షుణ్నంగా పరిశీలించిన సాంకేతిక సమాచార విశ్లేషణ మండలి విపుల సూచనలతో నివేదిక సమర్పించింది. సత్వరం ముడిఔషధాల పరంగా స్వావలంబన సాధించాల్సిన అవసరాన్ని, జాతీయ స్థాయిలో జెనరిక్‌ ఔషధాల నిల్వల ఆవశ్యకతనూ ప్రస్తావించిన మండలి- దేశీయ ఉత్పాదనలకు ఊపునిచ్చేలా కస్టమ్స్‌ సుంకాల్లో దిద్దుబాట్లూ జరగాలంటోంది. దేశీయంగా బల్క్‌డ్రగ్స్‌ తయారీకి ప్రభుత్వాలు ఇక వెన్నుదన్నుగా నిలవాలి!
క్షేత్రస్థాయిలో మార్పులు రావాలి
పెద్దయెత్తున పారిశ్రామిక కాలుష్యం సృష్టిస్తున్నాయంటూ రెండేళ్లనాడు బీజింగ్‌ బల్క్‌డ్రగ్‌ యూనిట్లపై కొరడా ఝళిపించడంతో- ఇండియాలో విటమిన్‌ సి మాత్రలకు కొరత ఏర్పడి కలకలం రేగింది. అంతకు మూడేళ్ల క్రితమే 2015ను 'ఏపీఐల సంవత్సరం'గా ప్రకటించిన కేంద్రం- వాటి ఉత్పాదనలో స్వయంసమృద్ధి సాధనకు అనువైన నిర్ణయాలు తీసుకోనున్నట్లు ప్రకటించింది. అంతకు రెండేళ్ల ముందే యూపీఏ ప్రభుత్వం ఏర్పాటుచేసిన డాక్టర్‌ వీఎం కాటోచ్‌ కమిటీ- దేశీయంగా బల్క్‌డ్రగ్స్‌ పరిశ్రమ మళ్ళీ బలంగా పాదుకొనే కార్యాచరణ వ్యూహాన్ని నివేదించింది. అయిదారు రాష్ట్రాల్లో అరడజను దాకా బల్క్‌డ్రగ్స్‌ ఉత్పాదక సముదాయాల్ని ఏర్పాటు చేయాలని; పెన్సిలిన్‌, పారాసెటమాల్‌ వంటి అత్యవసర ఔషధాలు ప్రభుత్వరంగంలోనే తయారు కావాలనీ సూచించింది. కాలుష్యరహితంగా క్లస్టర్ల అభివృద్ధి, నిర్వహణలకు ప్రభుత్వాలు సమధికంగా సహకరించాలని, శాస్త్రవేత్తలను ప్రోత్సహించాలనీ సిఫార్సు చేసింది. దురదృష్టవశాత్తు- పరిశోధనలకూ అనుమతులు అవసరమైన దేశం ప్రపంచంలో ఇండియా ఒక్కటేనన్న నిట్టూర్పులు క్షేత్రస్థాయిలో రావాల్సిన మార్పులేమిటో స్పష్టీకరిస్తున్నాయి. ఇన్‌ఫెక్షన్ల నివారణ ఔషధాల్లో అత్యంత కీలకమైన 'పెనిసిలిన్‌ జి' తయారీకి గతంలో ఆరు ప్లాంట్లు ఉండేవని, అవన్నీ చైనాకు తరలిపోయాయంటూ సర్కారు తోడ్పాటు లేకే పరిశ్రమ కుదేలైందన్న వాదనలున్నాయి.
కార్యచరణతోనే ఊపిరి
ఆ చేదు గతానికి చెల్లుకొట్టి, 38 అత్యవసర మందుల ముడిపదార్థాల్లో స్వావలంబనపై దృష్టి పెట్టిన కేంద్రం మొన్న మార్చిలో రూ.13 వేలకోట్ల ప్యాకేజీ ప్రకటించింది. చైనాకు దీటుగా రాణించే వ్యూహాత్మక కార్యాచరణే దేశీయ బల్క్‌ డ్రగ్స్‌ పరిశ్రమలకు ఊపిరిపోయగలిగేది!
