విద్యుదాఘాతంతో ఇద్దరు కార్మికులు మృతి

జనగామ జిల్లా చిల్పూర్ మండలం నస్కల్​లో ఓ ప్రైవేటు కంపెనీలో పనిచేస్తున్న ఇద్దరు కార్మికులు విద్యుదాఘాతంతో మృతి చెందారు.

జనగామ జిల్లా చిల్పూర్ మండలం నస్కల్​లో విషాదం జరిగింది. స్థానికంగా ఉన్న విగ్నేశ్వర గ్రానైట్ ప్రైవేటు లిమిటెడ్​ కంపెనీలో పనిచేస్తున్న ఇద్దరు కార్మికులు విద్యుదాఘాతంతో మృతిచెందారు.

ఫ్యాక్టరీలో కార్మికులుగా పనిచేస్తున్న సుంకరి సంతోష్, గుండ్రెడ్డి వేణుగోపాల్ రోజూలాగే విధులకు వచ్చారు. కార్యాలయం పక్క నుంచి ఇనుప నిచ్చెన తీసుకువెళ్ళే క్రమంలో భవనానికి అత్యంత చేరువలో ఉన్న 11కేవీ విద్యుత్​ తీగలకు తగిలింది. విద్యుత్​ ప్రసరించి నిచ్చెన్ని పట్టుకు వెళ్తున్న ఇద్దరూ అక్కడికక్కడే మృతిచెందారు.

ప్రమాదానికి కారణాలేంటి

ఘటనా ప్రదేశానికి చేరుకున్న మృతుల కుటుంబీకులు కన్నీరు మున్నీరుగా విలపించారు. గ్రామంలో విషాద ఛాయలు అలుముకున్నాయి. తక్కువ ఎత్తులో విద్యుత్​ తీగలు ఉండటం వల్లే ప్రమాదం జరిగిందని స్థానికులు ఆరోపిస్తున్నారు. తదుపరి ఎలాంటి అవాంఛనీయ ఘటనలు జరగకుండా ముందస్తు చర్యగా ఫ్యాక్టరీ పరిసరాల్లో పోలీసులు బందోబస్తు ఏర్పాటు చేశారు.

ఇదీ చదవండి:విద్యార్థిని కంట్లో పెన్సిల్​తో దాడి