రోడ్డు దాటుతున్న ఇద్దరు కూలీలను పొట్టనబెట్టుకున్న లారీ

పొట్ట కూటి కోసం కూలీ పనులకు వెళ్తున్న ఆ కూలీలను లారీ రూపంలో వచ్చిన మృత్యువు మింగేసింది. రోడ్డు దాటుతున్న ఆ వృద్ధ కూలీలను మెరుపు వేగంతో వచ్చిన లారీ... మృత్యుశకటమై అనంతలోకాలకు చేర్చింది. ఈ దుర్ఘటన రంగారెడ్డి జిల్లా హయత్​నగర్​లో చోటుచేసుకుంది.

రంగారెడ్డి జిల్లా హయత్​నగర్​లో ఘోర రోడ్డు ప్రమాదం జరిగింది. రోడ్డు దాటుతున్న కూలీలను లారీ ఢీకొట్టిన ఘటనలో ఇద్దరు అక్కడికక్కడే మృతి చెందారు. హయత్​నగర్​లో నివాసముంటున్న పెంటల సుదర్శన్(70), అన్మగల్ భిక్షపతి(55) ఇద్దరు కలిసి కూలి పనికోసం వెళుతున్నారు. హయత్​నగర్​లోని వార్డ్ అండ్ డీడ్ విద్యా సంస్థల వద్ద రోడ్డు దాటుతుండగా... ఎల్బీనగర్ నుంచి పెద్ద అంబర్​పేట్ వైపు వేగంగా వెళుతున్న లారీ( టీఎస్​ 24 టీబీ 0153) ఢీకొట్టింది.

ప్రమాదంలో తీవ్ర గాయాలపాలైన ఇద్దరు కూలీలు అక్కడికక్కడే మృతి చెందారు. లారీ అతివేగం కారణంగానే ప్రమాదం జరిగిందని స్థానికులు చెబుతున్నారు. మృతదేహాలను పోస్ట్​మార్టం నిమిత్తం ఉస్మానియా ఆస్పత్రికి తరలించారు. పోలీసులు కేసు నమోదు చేసి దర్యాప్తు చేస్తున్నారు. ప్రస్తుతం లారీ డ్రైవర్​... పోలీసుల అదుపులో ఉన్నట్లు తెలుస్తుంది.

ఇదీ చూడండి: నీటిసంపులో పడి ఐదేళ్ల చిన్నారి మృతి