మేడ్చల్ జిల్లా షామీర్పేట్ ఠాణా పరిధిలో రెండు రోజుల క్రితం కుటుంబ కలహాలతో ఓ మహిళ పిల్లలకు విషమిచ్చి తాను ఆత్మహత్యాయత్నానికి పాల్పడింది. ఇద్దరు పిల్లలు మృతి చెందగా... కొనఊపిరితో ఆమెను ఆస్పత్రిలో చేర్చించారు. చికిత్స పొందుతున్న ఆమె ఆరోగ్యం విషమించి శుక్రవారం మృతి చెందింది.
షామీర్పేట్లోని అలియాబాద్ శివారులో ఉంటున్న గోపీనాథ్, ప్రీతికి ఇద్దరు సంతానం. గత కొంత కాలంగా వీరిద్దరి మధ్య తరచు గొడవలు జరిగేవి. ఈ క్రమంలో బుధవారం కూడా ఇద్దరి మధ్య తగాదా జరిగింది. మనస్తాపం చెందిన ప్రీతి... బుధవారం సాయంత్రం పిల్లలిద్దరికీ విషం ఇచ్చి తాను ఆత్మహత్యాయత్నానికి పాల్పడింది. పిల్లలు మృతి చెందగా కొన ఊపిరితో ఉన్న ఆమెను మేడ్చల్లోని ఓ ఆస్పత్రిలో చేర్పించారు. పరిస్థితి విషమించడం వల్ల అక్కడి నుంచి గాంధీ ఆస్పత్రికి తరలించారు. గాంధీలో చికిత్స పొందుతూ శుక్రవారం రాత్రి మృతి చెందింది. ఈ మేరకు కేసు నమోదు చేసుకున్న పోలీసులు దర్యాప్తు చేస్తున్నారు.
