వరద నీటి తంటాలు... కాలనీ వాసుల మధ్య గొడవలు

తమ కాలనీలోని వరద నీరు మళ్లించేందుకు గండి కొడుతుండగా... దిగువన ఉన్న కాలనీ వాసులు అడ్డుకున్నారు. ఈ క్రమంలో కర్రలతో దాడి చేసుకోగా ఇద్దరికి గాయాలయ్యాయి. ఈ ఘటన వనస్థలిపురంలో చోటు చేసుకుంది.

హైదరాబాద్​లోని వనస్థలిపురంలో కాలనీ వాసుల మధ్య వరద నీరు చిచ్చు పెట్టింది. అర్ధరాత్రి హరిహరపురం కాలనీలో ఉన్న నీరు వెళ్లడానికి... ఆ కాలనీవాసులు జేసీబీలతో కాలువలకు గండి కొట్టేందుకు యత్నించారు. హరిహరపురం కాలనీ కింద ఉన్న గాంధీ నగర్, స్నేహమయి నగర్ కాలనీ వాసులు దీన్ని అడ్డుకున్నారు.

ఇక్కడ నీరు పోయేందుకు గండి కొడితే... మా కాలనీలు ముంపునకు గురవుతాయంటూ ఆగ్రహం వ్యక్తం చేశారు. ఈ క్రమంలో హరిహరపురం వాసులు కర్రలతో దాడులకు దిగారు. ఈ ఘటనలో ఇద్దరికి గాయాలయ్యాయి. హరిహరపురం కాలనీ ప్రెసిడెంట్ హనుమంత రెడ్డితో పాటు మరో నలుగురిపై కేసు నమోదు చేశారు.

ఇదీ చూడండి: వరద నీటిలో చిక్కుకుని 100 గేదెలు మృత్యువాత