ఏసీబీ వలలో పంచాయతీ కార్యదర్శి, ఎంపీటీసీ

ప్రభుత్వం అవినీతికి పాల్పడవద్దంటూ ఎంత చెప్పినా కొంత మంది అధికారులు పెడచెవిన పెడుతున్నారు. ప్రతీదానికి ఓ రేటు నిర్ణయించి మరీ వసూలు చేస్తున్నారు. వీరికి ప్రజా ప్రతినిధులు కూడా తోడైతే వారికి అడ్డే ఉండదు. రంగారెడ్డి జిల్లా పుప్పాలగూడలో ఇలాగే ఓ పంచాయతీ కార్యదర్శి, ఎంపీటీసీ డబ్బులు వసూల్​ చేస్తూ ఏసీబీకి దొరికిపోయారు.

రంగారెడ్డి జిల్లా పుప్పాలగూడలో అలీ అనే వ్యక్తి తన భవనంలో అదనపు నిర్మాణాలు చేపట్టాడు. అన్ని అనుమతులు ఉన్నా.. తమకు లంచం ఇవ్వాల్సిందేనని పంచాయతీ కార్యదర్శి శివయ్య, ఎంపీటీసీ శివప్రసాద్ నెలరోజులుగా బెదిరిస్తున్నారు. 5 లక్షలు ఇవ్వాలని డిమాండ్​ చేశారు. చివరికి 2 లక్షల వద్ద బేరం కుదిరింది.

రేపు రిమాండ్​కు

ఈ విషయాన్ని బాధితుడు ఏసీబీకి ఫిర్యాదు చేశారు. కేసు నమోదు చేసుకున్న అధికారులు ఎంపీటీసీ, కార్యదర్శిని వలపన్ని పట్టుకున్నారు. నిందితులను రేపు రిమాండ్​కు తరలించనున్నట్లు ఏసీబీ డీఎస్పీ సూర్యనారాయణ తెలిపారు.

ఇవీ చూడండి:ఈ పార్టీకి మేనిఫెస్టో లేదు, అయినా గెలుస్తూనే ఉంది