Massive Encounter in Mulugu District : మావోయిస్టులకు మరో ఎదురు దెబ్బ తగిలింది. ములుగు జిల్లా ఏటూరు నాగారం చల్పాక అటవీ ప్రాంతంలో ఎన్కౌంటర్ జరిగింది. భద్రతా దళాలు, మావోయిస్టులకు మధ్య కాల్పులు జరిగాయి. ఈ ఘటనలో ఏడుగురు మావోయిస్టులు మరణించారు. తెలంగాణ గ్రేహౌండ్స్‌, యాంటీ మావోయిస్ట్‌ స్వాడ్‌ సంయుక్తంగా చేపట్టిన ఈ ఆపరేషన్‌లో మావోయిస్టులు మృతి చెందారు.
మృతుల్లో మావోయిస్టు కీలక నేతలున్నట్లు సమాచారం. ఇల్లందు నర్సంపేట ఏరియా కమిటీ కార్యదర్శి భద్రు అలియాస్‌ పాపన్నతో పాటు అతని దళ సభ్యులు మరణించినట్లు తెలుస్తోంది. మృతుల్లో కురుసం మంగు అలియాస్‌ భద్రు అలియాస్‌ పాపన్న(35), ముస్సకి దేవల్‌ అలియాస్‌ కరుణాకర్‌ (22), ముస్సకి జమున (23), మల్లయ్య అలియాస్‌ మధు (43), జైసింగ్‌ (25), కామేశ్ (23), కిశోర్‌ (22) ఉన్నట్లు సమాచారం.
ఇద్దరు అమాయకులను చంపారు : ఎన్‌కౌంటర్‌పై ములుగు ఎస్పీ షబరీష్‌ వివరాలు వెల్లడించారు. 'వాజేడులో ఇద్దరు అమాయకులను మావోయిస్టులు చంపారని ఎస్పీ పేర్కొన్నారు. దీంతో ఆ ప్రాంతంలో పెట్రోలింగ్ పెంచామన్నారు. ఆదివారం ఉదయం 6 గంటల ప్రాంతంలో పోలీస్ పెట్రోలింగ్ టీమ్‌కు 10 నుంచి 15 మంది మావోయిస్టులు కనిపించారని, వారు పోలీసులను చూసి కాల్పులు జరిపారని తెలిపారు. లొంగిపోవాలని పలుమార్లు హెచ్చరించినా కాల్పులు ఆపకపోవడంతో ఆత్మ రక్షణ కోసం పోలీసులు కాల్పులు జరపాల్సి వచ్చిందని వివరించారు. కాల్పుల తర్వాత వెతకగా, ఏడుగురు చనిపోయినట్లు గుర్తంచామని చెప్పారు. ఇలాంటి ఘటనలను అరికట్టడానికి జిల్లా వ్యాప్తంగా పెట్రోలింగ్ పెంచినట్లు స్పష్టం చేశారు.
అడవుల్లో అలజడి - ఇన్‌ఫార్మర్ల నెపంతో ఇద్దరిని హతమార్చిన మావోయిస్టులు - భయాందోళనలో గిరిపుత్రులు
ఏజెన్సీలో ఉద్రిక్త పరిస్థితులు : మావోయిస్టుల ఎన్కౌంటర్ నేపథ్యంలో ఏటూరు నాగారం ఏజెన్సీ ప్రాంతంలో ఉద్రిక్త పరిస్థితులు నెలకొన్నాయి. ఈ కాల్పుల్లో ఏడుగురు మావోయిస్టులు మృతి చెందగా, మరో 8 మంది తప్పించుకున్నట్లు పోలీసులు భావిస్తున్నారు. వీరి కోసం ఛత్తీస్‌గఢ్‌, తెలంగాణ సరిహద్దు ప్రాంతంతో పాటు తాడ్వాయి, ఏటూరు నాగారం, వెంకటాపురం, గోవిందరావుపేట మండలాల్లో గాలింపు చర్యలు చేపట్టారు. ప్రధాన రహదారుల మీదుగా వచ్చి పోయే వాహనాల్లో సోదాలు నిర్వహిస్తున్నారు. అనుమానితులు ఉంటే వారిని అదుపులోకి తీసుకుని విచారిస్తున్నారు.
క్షణ క్షణం - భయం భయం : మావోయిస్టుల నుంచి ప్రతికార చర్యలు ఎదురయ్యే అవకాశం ఉన్నందున అన్ని పోలీస్ స్టేషన్లను అప్రమత్తం చేశారు. ఈ ఘటన నేపథ్యంలో ఏజెన్సీలో ఏం జరుగుతుందో అని ప్రజలు భయాందోళనలకు గురవుతున్నారు.
