పెగసస్ స్పైవేర్ తయారు చేసిన ఎన్ఎస్ఓ గ్రూప్ను (NSO group) అమెరికా బ్లాక్లిస్ట్లో చేర్చడం సహా.. అంతర్జాతీయంగా ఈ సంస్థపై వివాదాలు చెలరేగుతున్న నేపథ్యంలో ఇజ్రాయెల్ ప్రభుత్వం వెనక్కి తగ్గింది. ఎన్ఎస్ఓ గ్రూప్తో (NSO Pegasus) ఇజ్రాయెల్ ప్రభుత్వానికి సంబంధం లేదని ప్రకటించింది. ఎన్ఎస్ఓ ఓ ప్రైవేటు సంస్థ మాత్రమేనని స్పష్టం చేసింది. ఆ కంపెనీకి ఇజ్రాయెల్ గుర్తింపు ఇచ్చినప్పటికీ.. ప్రభుత్వ విధానాలతో ఎన్ఎస్ఓ గ్రూప్నకు ఎలాంటి సంబంధం లేదని విదేశాంగ మంత్రి యాయిర్ లాపిడ్ తెలిపారు. ఇజ్రాయెల్ ప్రధాని నాఫ్తాలీ బెన్నెట్, ఆర్థిక మంత్రి ఆవిగ్డోర్ లిబర్మన్తో కలిసి ఏర్పాటు చేసిన సంయుక్త మీడియా సమావేశంలో ఈ విషయాన్ని వెల్లడించారు.
సైబర్ రంగంలో ఇజ్రాయెల్ కఠిన నిబంధనలు అమలు చేస్తోందని లాపిడ్ పేర్కొన్నారు. ప్రపంచంలో మరే ఇతర దేశం కూడా ఇలాంటి నిబంధనలు పాటించడం లేదని చెప్పారు. ఈ నిబంధనలను ఇంతే కఠినంగా కొనసాగిస్తామని స్పష్టం చేశారు.
అమెరికా ఆంక్షలు
స్పైవేర్ను దుర్వినియోగం చేసిందన్న ఆరోపణలతో ఎన్ఎస్ఓ గ్రూప్ను (NSO Group Pegasus) బ్లాక్లిస్ట్లోకి చేర్చింది అమెరికా. జాతి భద్రత, విదేశాంగ విధానాలకు వ్యతిరేకంగా ఈ సంస్థ కార్యకలాపాలు సాగిస్తోందని పేర్కొంది. స్పైవేర్ను విదేశాల్లోని ప్రభుత్వాలకు సరఫరా చేసి.. ప్రభుత్వ అధికారులు, జర్నలిస్ట్లు, వ్యాపారవేత్తలు, ఉద్యమకారులు, విద్యావేత్తలు, రాయబారులపై నిఘా వేశారని ప్రకటనలో తెలిపింది. ఈ సాఫ్ట్వేర్ను ఉపయోగించి నియంతృత్వ ప్రభుత్వాలు.. తమపై అసమ్మతి వ్యక్తం చేసేవారిని అణచివేశాయని పేర్కొంది. ఇలాంటి కార్యకలాపాలు అంతర్జాతీయ విధానాలకు భంగం కలిగిస్తాయని అభిప్రాయపడింది.
పాలస్తీనియన్లపై ఇజ్రాయెల్ నిఘా!
మరోవైపు, పెగసస్ స్పైవేర్ను ఉపయోగించి పాలస్తీనా మానవహక్కుల ఉద్యమకారులపై నిఘా వేసినట్లు తాజాగా వెల్లడైంది. ఆరుగురు ఉద్యమకారుల ఫోన్లలో ఈ స్పైవేర్ ఆనవాళ్లు బయటపడ్డాయి. 'ఫ్రంట్లైన్ డిఫెండర్స్' అనే స్వచ్ఛంద సంస్థకు చెందిన మహమ్మద్ అల్ మస్కాటి ఈ విషయాన్ని గుర్తించారు.
అయితే, వారి ఫోన్లలో ఎవరు స్పైవేర్ను చొప్పించారనే విషయం తెలియలేదని మస్కాటి పేర్కొన్నారు. అక్టోబర్ మధ్యలో ఇద్దరి ఫోన్లలో సైబర్ దాడి జరిగిందని తెలిపారు. ఆ తర్వాత కొద్దిరోజులకే ఆరు పాలస్తీనా సివిల్ సొసైటీ గ్రూప్లపై.. ఉగ్రవాద ముద్ర వేస్తూ ఇజ్రాయెల్ రక్షణ మంత్రి బెన్నీ గంట్జ్ ప్రకటన చేశారని వివరించారు. హ్యాకింగ్కు గురైన ఆరుగురిలో ముగ్గురికి ఈ సివిల్ సొసైటీలతో సంబంధం ఉందని చెప్పారు. ఈ నేపథ్యంలో ఇజ్రాయెలే హ్యాకింగ్కు పాల్పడి ఉండొచ్చని ఇద్దరు బాధితులు అనుమానం వ్యక్తం చేశారని వెల్లడించారు. సివిల్ సొసైటీ గ్రూప్లు ఉగ్ర సంస్థలని చెప్పేందుకు సరైన ఆధారాలు కూడా ఇజ్రాయెల్ చూపించలేదని మస్కాటి పేర్కొన్నారు.
ఏంటీ పెగసస్?
ఇజ్రాయెల్కు చెందిన ఎన్ఎస్ఓ గ్రూప్.. రూపొందించిన హ్యాకింగ్ సాఫ్ట్వేరే పెగసస్. ప్రభుత్వాలకు, దర్యాప్తు ఏజెన్సీలకు మాత్రమే పెగసస్ సాఫ్ట్వేర్ను విక్రయిస్తుంది ఎన్ఎస్ఓ గ్రూప్. ఉగ్రవాదం, నేరాలపై దర్యాప్తు చేసేందుకు మాత్రమే దీన్ని వినియోగించాల్సి ఉంటుంది. అయితే, భారత్ సహా ప్రపంచ వ్యాప్తంగా వివిధ దేశాల్లో ఈ స్పైవేర్ను దుర్వినియోగం చేశారని ఆరోపణలు ఉన్నాయి.
ఇదీ చదవండి: పెగసస్పై నిజాలు వెలుగు చూడాల్సిందే!
