United States Army Emails : అగ్రరాజ్యం అమెరికాకు చెందిన సైనిక రహస్యాలు, మ్యాప్‌లు, పాస్‌వర్డ్‌లు ఉన్న లక్షల కొద్దీ ఈమెయిల్స్ రష్యా మిత్రదేశమైన మాలి చేతికి దక్కాయి. దీనంతటికీ ఒక టైపింగ్‌ తప్పు కారణమైంది. సాధారణంగా అమెరికా సైన్యం తమ బృందాలతో కమ్యూనికేషన్ల కోసం .MIL అనే ఎక్స్‌టెన్షన్‌ ఉన్న డొమైన్‌ వాడుతుంది. కానీ, చాలా సందర్భాల్లో అమెరికా సైన్యంలోని వారు మెయిల్‌ చేసే సమయంలో పొరపాటున .ML అని టైపు చేసేవారు. దీంతో ఆ మెయిల్స్ మొత్తం మాలి డొమైన్‌కు వెళ్లిపోయాయి. వీటిల్లో అమెరికా ఆర్మీ చీఫ్‌ పర్యటనలో బసచేసే హోటల్‌ గది నంబర్ల వంటివి కూడా ఉండడం గమనార్హం.
US Army Emails Mali : అమెరికాకు చెందిన ఈమెయిల్స్.. మాలికి వెళ్లాయని జోహన్నస్ జూర్బిర్ అనే డచ్‌ వ్యాపారవేత్త గుర్తించాడు. జూర్బిర్.. మాలి డొమైన్‌ నిర్వహణ బాధ్యతలు చూస్తున్నాడు. దాదాపు 10 ఏళ్ల నుంచి అమెరికా సైన్యం నుంచి లక్షల సంఖ్యలో మెయిల్స్ వచ్చినట్లు అతడు తెలిపాడు. తొలుత తమ డొమైన్‌లో లేని మెయిల్‌ అడ్రస్‌లకు కూడా .ML ఎక్స్‌టెన్షన్‌తో మెయిల్స్ రావడాన్ని గమనించాడు. ఆ తర్వాత ఇవి పొరబాటున వస్తున్నట్లు గమనించాడు. దీంతో ఇటువంటి మెయిల్స్‌ను ఓ చోటకు చేర్చడానికి ప్రత్యేక వ్యవస్థ ఏర్పాటు చేశాడు. ఈ ఏడాది జనవరి నుంచి ఇటువంటివి 1,17,000 ఈమెయిల్స్ వచ్చాయి. వీటిల్లో అమెరికా సైన్యానికి చెందిన మ్యాప్‌లు, పాస్‌వర్డ్‌లు, సైనికుల మెడికల్‌ రికార్డులు, స్థావరాల ఫొటోలు, స్థావరాల్లో సిబ్బంది సంఖ్య, నౌకాదళ కదలికలు, నౌకల్లో సిబ్బంది వివరాలు, పన్ను వివరాలు వంటి కీలకమైన సమాచారం కూడా ఉంది. మెయిల్స్ దారి మళ్లుతున్న విషయంపై జోహన్నస్ జూర్బిర్ చాలా సార్లు అమెరికా ప్రభుత్వాన్ని హెచ్చరించాడు.
వీటిల్లో అమెరికా సైనిక సిబ్బంది, సైన్యంతో కలిసి పనిచేసే ట్రావెల్‌ ఏజెంట్లు, ఇంటెలిజెన్స్ సిబ్బంది, ప్రైవేటు కాంట్రాక్టర్లు, ఇతరులు పంపిన మెయిల్స్ అధికంగా ఉన్నాయి. కొన్నాళ్ల క్రితం అమెరికా ఆర్మీ చీఫ్‌ ఆఫ్‌ స్టాఫ్‌ జనరల్‌ జేమ్స్‌ మెక్‌కాన్వెలీ ఇండోనేషియాలో పర్యటించారు. ఆ పర్యటనలో ఆయన బసచేసిన రూమ్‌ నంబర్ల సంఖ్యలతో సహా ఉన్న ఈమెయిల్‌ కూడా దారి మళ్లింది. దీనిలో గ్రాండ్‌ హయత్‌ జకార్తాలోని రూమ్‌ కీ కలెక్షన్‌ కూడా ఉన్నట్లు తెలుస్తోంది.
రష్యా చేతికి దక్కితే..
మాలి ప్రభుత్వంతో జోహన్నస్ జూర్బిర్ కాంట్రాక్టు సోమవారంతో ముగిసింది. దీంతో మాలి ప్రభుత్వమే నేరుగా ఈ డొమైన్‌ను అధీనంలోకి తీసుకొంది. దీంతో దారిమళ్లిన అమెరికా ఈమెయిల్స్ ఆ దేశం సిబ్బంది చూసే అవకాశం ఉంది. ఇప్పటికే రష్యా కిరాయి సైన్యం వాగ్నర్‌ గ్రూప్‌ గతేడాది నుంచి మాలిలోనే ఉంది. ఉక్రెయిన్‌ యుద్ధానికి అవసరమైన కీలక పరికరాలను రవాణా చేయడానికి దీనిని కీలక మార్గంగా వాడుకొంటోంది. వాస్తవానికి వాగ్నర్‌ గ్రూప్‌ ప్రధాన ఆయుధం సైబర్‌ దాడులే. అలాంటి గ్రూప్‌ చేతికి ఇవి దక్కితే అమెరికాకు తిప్పలు తప్పవు. మరోవైపు ఈ విషయాన్ని తాము తీవ్రంగా పరిగణిస్తున్నట్లు అమెరికా రక్షణ శాఖ ప్రతినిధి టామ్‌ గోర్మన్‌ తెలిపారు. .MILకు వెళ్లకుండా మాలి డొమైన్‌కు వెళుతున్న ఈమెయిల్స్‌ను బ్లాక్‌ చేసినట్లు ఆయన వెల్లడించారు. వాటిని పంపిన వారికి విషయాన్ని వెల్లడిస్తున్నామన్నారు.
