బహిరంగ మల విసర్జన ద్వారా కరోనా వ్యాప్తి!

కరోనా మహమ్మారి మానవ శరీరంలోకి ఏవిధంగా ప్రవేశిస్తుందనే అంశంపై పరిశోధనలు జరుగుతున్నయి. మనుషుల పేగు కణాలకు వైరస్ ఏ విధంగా సోకుతుందనే విషయాన్ని తాజాగా ఓ అధ్యయనం వెల్లడించింది. కణాల్లో ఏ విధంగా కరోనా తన సంఖ్యను వృద్ధి చేసుకుంటుంది, కణాలు ఏ విధంగా స్పందిస్తున్నాయనే విషయాలను వెలుగులోకి తెచ్చింది.

దగ్గు, జలుబు, ఊపిరి పీల్చుకోవడంలో ఇబ్బందులు, జ్వరం... చాలా మందికి తెలిసిన కరోనా లక్షణాలివే. కానీ... కొన్ని కేసుల్లో మాత్రం రోగులు జీర్ణాశయ సంబంధిత సమస్యలతో బాధపడుతున్నారు. ఎందుకు ఇలా? ఈ ప్రశ్నకు సమాధానం కనుగొనే ప్రయత్నం చేశారు లండన్, నెదర్లాండ్స్​కు చెందిన శాస్త్రవేత్తలు. మనుషుల పేగు కణాలకు కొవిడ్​-19 ఏవిధంగా సోకుతుంది, పేగుల్లో వైరస్​ సంఖ్య ఎలా వృద్ధి చెందుతుందనే విషయాన్ని కనుగొన్నారు. ఈ పరిశోధనకు సంబంధించి వ్యాసం సైన్స్ జర్నల్​లో ప్రచురితమైంది.

కరోనా రోగుల్లో మూడింట ఒకటో వంతు మందిలో అతిసారం వంటి లక్షణాలు ఉన్నట్లు అధ్యయనంలో తేలింది. తరచుగా మలం నమూనాలలో వైరస్​ కనిపించినట్లు వెల్లడైంది. వైరస్​ నుంచి కోలుకున్న తర్వాత చాలా రోజులకు కూడా మలంలో ఈ వైరస్​ను గుర్తించినట్లు తెలిపింది. బహిరంగ మలవిసర్జన ద్వారా ఈ వైరస్​ వ్యాప్తి చెందే అవకాశం ఉందని హెచ్చరించింది.

పేగులోని ఆర్గనోయిడ్స్​పై పరిశోధన..

కొవిడ్​-19 ప్రవేశించేందుకు కారణమయ్యే ఏసీఈ-2 అనే ఎంజైమ్​లు పేగుల్లో ఎక్కువ మొత్తంలో ఉండటం కూడా వైరస్​ సోకేందుకు కారణం కావచ్చని పరిశోధకులు అంచనా వేశారు. అయితే.. వైరస్​ సోకేందుకు, వాటి సంఖ్యను పెంచుకునేందుకు పేగు కణాలు సహకరిస్తాయనేది పూర్తిస్థాయిలో తెలియదని చెప్పారు. అందువల్ల.. ప్రయోగశాలలో మానవ పేగులోని ఆర్గనోయిడ్స్​పై వైరస్​ ఏవిధంగా ప్రభావం చూపుతుందనే విషయం తెలుసుకునే ప్రయత్నం చేశారు శాస్త్రవేత్తలు. ఆర్గనోయిడ్స్​పై వైరస్​ను ప్రవేశపెట్టగానే పేగు కణాలు పూర్తిగా ప్రభావితమైనట్లు తేల్చారు. క్రమానుగుణంగా వైరస్​ బారిన పడిన కణాల సంఖ్య పెరిగినట్లు గుర్తించారు.

వైరస్​కు ఆర్గనోయిడ్​ కణాలు ఏవిధంగా స్పందిస్తున్నాయనే అంచనా వేస్తున్న క్రమంలో రోగనిరోధక వ్యవస్థలోని జన్యువులు, ప్రొటీన్లు ఉత్తేజితమైనట్లు కనుగొన్నారు పరిశోధకులు. ఈ జన్యువులు వైరస్​ సంక్రమణపై పోరాడతాయని వెల్లడించారు. భవిష్యత్తులో కొత్త రకం చికిత్సలను కనుగొనేందుకు ఈ జన్యువులపై ఎక్కువగా దృష్టి సారించే అవకాశం ఉన్నట్లు తెలిపారు.

సంక్రమణను అడ్డుకుంటుంది..

ఈ పరిశోధన ఫలితాలు మానవ కణాల్లోకి వైరస్​ సంక్రమణను అడ్డుకునేందుకు ఉపయోగపడుతాయని శాస్త్రవేత్తలు ఆశాభావం వ్యక్తం చేశారు.

"జీర్ణాశయంలోని కణాల్లో కరోనా వైరస్​ తన సంఖ్యను పెంచుకుంటుందని ఈ పరిశోధన ద్వారా రుజువైంది. అయినప్పటికీ.. కరోనా రోగుల పేగుల్లో ఈ వైరస్​ ఉందని ఇంకా పూర్తి స్థాయిలో నిర్ధరణ కాలేదు. కరోనా వ్యాప్తి గురించి మరింత క్షుణ్నంగా తెలుసుకునేందుకు ఈ పరిశోధన ఉపయోగపడుతుంది."

– బార్ట్​ హాగ్​మ్యాన్స్​, సహ రచయిత