90వ దశకంతో పోల్చుకుంటే ప్రస్తుతం భారతీయుల ఆయుర్దాయం పదేళ్లు పెరిగిందని.. ప్రఖ్యాత మెడికల్ జర్నల్ లాన్సెట్ వెల్లడించింది. భారత్‌లో 1990లో ఆయుర్దాయం 59 ఏళ్ల ఆరు నెలలు ఉండగా.. 2019లో అది 70 ఏళ్ల 8 నెలలకు పెరిగిందని ఓ అధ్యయనం వెల్లడించినట్లు లాన్సెట్ ప్రచురించింది.
అయితే రాష్ట్రాల మధ్య అసమానతలు ఉన్నాయని తెలిపింది లాన్సెట్. కేరళలో గరిష్ఠంగా ఆయుర్దాయం 77 ఏళ్ల 3 నెలలు ఉండగా.. ఉత్తర్‌ప్రదేశ్‌లో కనిష్ఠంగా 66 ఏళ్ల 9 నెలలు ఉన్నట్లు అధ్యయనం తెలిపింది. ప్రపంచ వ్యాప్తంగా 200కి పైగా దేశాల్లో 286 మరణాలకు గల కారణాలు, 369 వ్యాధులపై ఈ అధ్యయనాన్ని నిర్వహించారు.
భారత్‌లో ఎక్కువగా నమోదయ్యే ప్రసూతి మరణాలు ఇప్పుడు తగ్గాయని.. గుండె, క్యాన్సర్‌ వంటి వ్యాధులు పెరుగుతున్నాయని వెల్లడించింది. భారత్‌ సహా చాలా దేశాల్లో అంటు వ్యాధులు క్షీణిస్తుండగా.. దీర్ఘకాలిక రోగాలు పెరుగుతున్నాయని తెలిపింది. భారత్‌లో 2019లో నమోదైన మరణాల్లో అధికంగా వాయు కాలుష్యం, అధిక రక్తపోటు, పొగాకు వాడకం, పౌష్టికాహార లోపం వల్లే సంభవించాయని లాన్సెట్ అధ్యయనం వెల్లడించింది.
ఇదీ చూడండి:'పోషకాహార లోపాన్ని అధిగమించేందుకు చర్యలు'
