ఆక్స్ఫర్డ్-ఆస్ట్రాజెనెకా టీకా మూడో దశ ట్రయల్స్ ప్రస్తుతం తాత్కాలికంగా నిలిచిపోయాయి. అయితే.. ట్రయల్స్కు బ్రేక్ పడినా ఈ ఏడాది చివరి నాటికి లేదా 2021 తొలినాళ్లలో అందుబాటులోకి ప్రజలకు అందుబాటులోకి తెస్తామని ఆశాభావం వ్యక్తం చేశారు సంస్థ కార్యనిర్వాహణ అధికారి (సీఈఓ) పాస్కల్ సోరియట్. టీకా ట్రయల్స్లో ఇలాంటివి జరగటం సాధారణమేనని తెలిపారు.
టర్టోయిస్ మీడియా గ్రూప్ నిర్వహించిన కార్యక్రమంలో.. గార్డియన్ న్యూస్పేపర్ కథనాన్ని పేర్కొంటూ ఈ మేరకు వ్యాఖ్యానించారు పాస్కల్. వచ్చే వారంలోనే కొవిడ్-19 వ్యాక్సిన్ ట్రయల్స్ను పునరుద్ధరించే అవకాశం ఉందని నివేదించింది గార్డియన్ వార్తా సంస్థ.
" ఈ ఏడాది చివరి నాటికి లేదా వచ్చే ఏడాది తొలినాళ్లలోనే వ్యాక్సిన్ తీసుకొస్తాం. డిసెంబర్ నాటికి నియంత్రణ సంస్థల అనుమతుల కోసం మా టీకా డేటాను సమర్పిస్తామనే నమ్మకం ఉంది."
- పాస్కల్ సోరియట్, ఆస్ట్రాజెనెకా సీఈఓ
నాడీ వ్యవస్థపై ప్రభావంతోనే..!
ఆక్స్ఫర్డ్ టీకా మూడో దశ ట్రయల్స్లో భాగంగా బ్రిటన్లో టీకా తీసుకున్న ఓ వ్యక్తికి అనారోగ్య లక్షణాలు గుర్తించిన నేపథ్యంలో తాత్కాలికంగా నిలిపివేసింది ఆస్ట్రాజెనెకా. ముందుగా.. అంతుపట్టని లక్షణాలు ఉన్నట్లు తెలిపగా.. తాజాగా లక్షణాలు గుర్తించినట్లు వెల్లడించారు సంస్థ ప్రతినిధి మాథ్యూ కెంట్. బ్రిటన్లో వ్యాక్సిన్ తీసుకున్న మహిళలో నాడీవ్యవస్థ దెబ్బతిన్నట్లు లక్షణాలు కనిపించటం వల్లే ట్రయల్స్ నిలిచిపోయినట్లు ప్రకటించారు. వెన్నముకలో అరుదైన మంట కలిగించే.. ట్రాన్స్వర్స్ మైలిటిస్ సంబంధించిన లక్షణాలు గుర్తించినట్లు తెలిపారు. అయితే అది పూర్తిస్థాయిలో నిర్ధరణ కాలేదని.. మరిన్ని పరీక్షలు చేస్తున్నట్లు చెప్పారు.
ఇదీ చూడండి: ఆక్స్ఫర్డ్ వ్యాక్సిన్ మూడోదశ ట్రయల్స్ నిలిపివేత!
