అఫ్గానిస్థాన్లో శాశ్వత శాంతి స్థాపనకు జరిగిన కీలక ప్రయత్నం విఫలమైంది. కొద్ది రోజుల క్రితం కుదిరిన శాంతి ఒప్పందాన్ని రద్దు చేసుకుంటున్నట్లు ప్రకటించారు తాలిబన్లు. అఫ్గాన్ సైన్యంపై తమ పోరాటాన్ని తిరిగి ప్రారంభిస్తామని స్పష్టంచేశారు.
అఫ్గాన్ అధ్యక్షుడు అష్రఫ్ ఘనీ మార్చి 10న ప్రారంభమయ్యే శాంతి చర్చలకు ముందు తాలిబన్ ఖైదీలను విడుదల చేసేది లేదని స్పష్టం చేసిన మరుసటిరోజే తాలిబన్లు ఈ ప్రకటన చేశారు. తాలిబన్ ఖైదీల విడుదల నిర్ణయంపై అమెరికా జోక్యానికి తావు లేదని ఘని తేల్చి చెప్పారు. ఫలితంగా అమెరికా-తాలిబన్ల మధ్య జరిగిన శాంతి ఒప్పందానికి ఆదిలోనే అడ్డంకులు ఏర్పడినట్టయింది.
ఈ నేపథ్యంలో తాము ఒప్పందాన్ని రద్దు చేసుకుంటున్నట్లు తాలిబన్లు తెలిపారు. దోహా ఒప్పందం ప్రకారం విదేశీ బలగాలపై దాడులు చేయబోమని చెప్పారు. అప్గాన్ పరిపాలనా బలగాలకు వ్యతిరేకంగా తమ కార్యకలాపాలు కొనసాగుతాయని స్పష్టం చేశారు.
శాంతి ఒప్పందం...
గత 18 ఏళ్లుగా అఫ్గానిస్థాన్లో కొనసాగుతున్న అశాంతికి ముగింపు పలుకుతూ అమెరికా-తాలిబన్ల మధ్య శనివారం శాంతి ఒప్పందం కుదిరింది. ఒప్పందంలో భాగంగా 5000 మంది వరకు తాలిబన్ ఖైదీలను అఫ్గాన్ ప్రభుత్వం, 1000 మంది ఖైదీలను తాలిబన్లు విడుదల చేయాలని నిర్ణయించారు.
రానున్న 14 నెలల్లో ప్రణాళికాబద్ధంగా తమ సైనిక దళాలను అఫ్గానిస్థాన్ నుంచి ఉపసంహరిస్తామని అమెరికా మాత్రం పేర్కొంది. అయితే ఇదంతా ఉగ్రవాద నిరోధక పనితీరుతో ముడిపడి ఉంటుందని స్పష్టం చేసింది. దీనికి అఫ్గాన్ అంతర్గత చర్చల పురోగతితో సంబంధం లేదని పేర్కొంది.
అయితే మార్చి 10న నార్వే రాజధాని ఓస్లోలో అఫ్గాన్ వర్గాల మధ్య శాంతి చర్చలు ప్రారంభం కానున్నాయి. తాజాగా అఫ్గాన్ అధ్యక్షుడు అష్రఫ్ ఘనీ వ్యాఖ్యలు, తాలిబన్ల ప్రకటన ఒప్పందంపై నీలినీడలు కమ్ముకునేలా చేశాయి.
