How to Make Rava Pongali at Home : పొంగలి అనగానే చాలా మందికి స్వీట్ రెసిపీ అయిన చక్కెర పొంగలి గుర్తుకువస్తుంది. కానీ మనం ఇంట్లో ఉప్మా కోసం ఉపయోగించే గోధుమ రవ్వతో కూడా అద్భుతమైన పొంగలి చేసుకోవచ్చు. కర్ణాటక స్పెషల్ అయిన రవ్వ పొంగలి బ్రేకఫాస్ట్కు సూపర్ ఆప్షన్. అంతేకాకుండా రాత్రి పూట లైట్గా తినాలనుకునేవారికి కూడా ఇది ఉపయోగకరంగా ఉంటుంది. ఇక దీని టేస్ట్ విషయానికి వస్తే ఎంతో రుచికరంగా ఉంటుంది. దీనికి కాంబినేషన్గా చట్నీ లేదా సాంబార్ అద్దిరిపోతుంది. ఇది ఆరోగ్యానికి కూడా మేలు చేస్తుంది. మరి ఈ రెసిపీకి కావాల్సిన పదార్థాలు, తయారీ విధానం ఈ స్టోరీలో తెలుసుకుందాం..
కావాల్సిన పదార్థాలు:
- పెసరపప్పు - పావు కప్పు
- గోధుమ రవ్వ - 1 కప్పు
- నీళ్లు - సరిపడా
- ఉప్పు - రుచికి సరిపడా
- నెయ్యి - 6 టేబుల్ స్పూన్లు
- మిరియాలు - అర టీ స్పూన్
- జీలకర్ర - అర టేబుల్ స్పూన్
- జీడిపప్పు - పావుకప్పు
- అల్లం తురుము - అర టేబుల్ స్పూన్
- పచ్చిమిర్చి చీలికలు - 4
- పచ్చి కొబ్బరి ముక్కలు - పావు కప్పు
- ఇంగువ - అర టీ స్పూన్
- కరివేపాకు - 2 రెబ్బలు
- పసుపు - పావు టీ స్పూన్
తయారీ విధానం:
- ముందుగా స్టవ్ ఆన్ చేసి పాన్ పెట్టి పెసరపప్పు వేసి సన్నని సెగ మీద మంచి వాసన వచ్చే వరకు కలుపుతూ వేయించుకోవాలి. పెసరపప్పు వేగి రంగు మారుతున్నప్పుడు దింపి కుక్కర్లో వేసుకోవాలి.
- ఇప్పుడు ఆ కుక్కర్లో 1 కప్పు నీళ్లు పోసి మూత పెట్టి మీడియం ఫ్లేమ్ మీద 5 విజిల్స్ వచ్చేవరకు ఉడికించుకుని పక్కన పెట్టండి.
- ఇప్పుడు అదే స్టవ్ మీద పెసరపప్పును వేయించుకున్న పాన్ పెట్టి కొద్దిగా నెయ్యి వేసి గోధుమ రవ్వ వేసి సన్నని సెగ మీద మంచి వాసన వచ్చే వరకు ఫ్రై చేసుకోవాలి. దీని కోసం ఓ 10 నిమిషాల సమయం పడుతుంది. ఆ తర్వాత తీసి మరో గిన్నెలోకి తీసుకోవాలి.
- ఈలోపు కుక్కర్ మూత తీసి ఉడికించుకున్న పప్పును మెత్తగా మెదుపుకోవాలి. ఆ తర్వాత స్టవ్ ఆన్ చేసి గిన్నె పెట్టి 5 కప్పుల నీరు తీసుకోండి. అందులోకి రుచికి సరిపడా ఉప్పు వేసి మరిగించుకోవాలి.
- నీరు బాగా మరుగుతున్నప్పుడు వేయించిన గోధుమ రవ్వను కొద్దికొద్దిగా పోసుకుంటూ కలుపుతుండాలి. ఆ తర్వాత మూత పెట్టి రవ్వను మెత్తగా ఉడికించాలి.
- రవ్వ మెత్తగా ఉడికిన తర్వాత.. ముందే మెత్తగా మెదుపుకున్న పెసరపప్పు మిశ్రమాన్ని వేసి మరో 5 నిమిషాలు ఉడికించి పక్కన పెట్టండి.
- ఇప్పుడు స్టవ్ మీద బాండీ పెట్టి నెయ్యి పోసుకోవాలి. నెయ్యి కాగిన తర్వాత మిరియాలు వేసి వేయించుకోవాలి.
- ఆ తర్వాత జీలకర్ర, జీడిపప్పు వేసి వేయించుకోవాలి. ఆ తర్వాత అల్లం తరుగు, పచ్చిమిర్చి చీలికలు వేసి ఓ నిమిషం పాటు ఫ్రై చేసుకోవాలి. అనంతరం పచ్చి కొబ్బరి ముక్కలు, ఇంగువ, కరివేపాకు వేసి కొబ్బరి ముక్కలు రంగు మారేవరకు వేయించాలి. ఆ తర్వాత పసుపు వేసి మరో నిమిషం పాటు వేయించాలి.
- ఈ వేగిన తాలింపును పొంగలిలో కలిపి వేడివేడిగా సర్వ్ చేసుకుంటే అద్భుతమైన టేస్ట్తో రవ్వ పొంగలి రెడీ. దీన్ని ప్లేట్లోకి తీసుకుని పైన కొద్దిగా నెయ్యి వేసుకుని చట్నీ లేదా సాంబార్తో తింటే మాటలుండవ్.. అంత అద్భుతంగా ఉంటుంది. నచ్చితే మీరూ ట్రై చేయండి.
ఉప్మారవ్వతో నిమిషాల్లో చేసుకునే "రవ్వ పూరీలు" - ఒక్కసారి తిన్నారంటే టేస్ట్కి ఎవరైనా ఫిదా!
నోట్లో వేసుకుంటే కరిగిపోయే రవ్వ కేసరి - పక్కా కొలతలతో ఇలా ప్రిపేర్ చేసుకుంటే అద్దిరిపోతుంది!
గుడిలో ప్రసాదంగా పెట్టే చక్కెర పొంగలి - ఇలా ప్రాచీన పద్ధతిలో చేస్తే అద్భుతం!
