ఆసియాన్ దేశాలతో బహుళ విభాగాల్లో సంబంధాల విస్తరణకు భారత్ కట్టుబడి ఉందని పేర్కొన్నారు ప్రధానమంత్రి నరేంద్ర మోదీ. భారత ఉపరితలం, గగనతలం, తీరప్రాంతాల్లో 10 దేశాలతో భారత్ అనుసంధానత ద్వారా కూటమిలోని సభ్యదేశాలు, భారత్ మధ్య ప్రాంతీయ వాణిజ్యం, ఆర్థిక వృద్ధి సాధ్యమవుతుందన్నారు.
మూడు రోజుల పర్యటనలో భాగంగా థాయిలాండ్లో పర్యటిస్తున్న ప్రధానమంత్రి నరేంద్ర మోదీ బ్యాంకాక్లో జరిగిన 16వ ఆసియాన్-భారత్ సదస్సుకు హాజరయ్యారు. ఈ సందర్భంగా పలు కీలక అంశాలపై ప్రసంగించారు.
తీరప్రాంత రక్షణ సహా వ్యవసాయం, ఇంజినీరింగ్, డిజిటల్ సాంకేతికత, పరిశోధన రంగంలో పరస్పర సహకారాన్ని పెంపొందించుకోవాల్సిన అవసరాన్ని వివరించారు మోదీ. పలు అంశాల్లో ఆసియాన్ కూటమిలోని సభ్యదేశాలతో కలిసి సహకరించేందుకు భారత్ సిద్ధంగా ఉందని తెలిపారు.
" సమకాలీన, సంఘటిత ఆర్థిక పురోగతి గల ఆసియాన్కు సహకారం అందించేందుకు భారత్ ముందుంటుంది. మేము ఉపరితలం, తీరప్రాంతం, గగనతలంలో ఆసియాన్ దేశాలతో అనుసంధానత బలోపేతానికి డిజిటల్ విధానాన్ని అభివృద్ధి పరిచేందుకు కట్టుబడి ఉన్నాం. డిజిటల్ అనుసంధానం కోసం ఒక బిలియన్ డాలర్లను ఖర్చు చేశాం. పరిశోధన, అనుసంధానం, వాణిజ్య, పర్యటక రంగానికి చెందిన వారి చేత భారత్లో పెట్టుబడులు పెట్టించేందుకు కృషి చేస్తున్నాం. ఈ లక్ష్యసాధనకు భారత్-ఆసియాన్తో సహా ఇతర దేశాలతో సంబంధాల బలోపేతానికి సిద్ధంగా ఉన్నాం."
- నరేంద్ర మోదీ, ప్రధానమంత్రి.
ఇండో-ఫసిఫిక్ ప్రాంతానికి సంబంధించి పరస్పర సహకారంపై కూటమి, భారత్ దేశాలు ఏకాభిప్రాయంతో ఉండటాన్ని ప్రధాని స్వాగతించారు.
ఈ పర్యటనలో భాగంగా థాయ్లాండ్ ప్రధాని, జనరల్ ప్రయూత్ చాన్ ఓ చాన్తో మోదీ సమావేశం కానున్నారు. ఇండోనేషియా అధ్యక్షుడు జోకో విడోడో.. మయన్మార్ కౌన్సిలర్ అంగ్సాన్ సూకీతో కూడా భేటీ అవుతారు. సాయంత్రం జరిగే విందులో పాల్గొంటారు.
ఇదీ చూడండి: '5 ట్రిలియన్ డాలర్ల భారత్ కల తొందరలోనే సాకారం'
