మయన్మార్లో సైనిక పాలనకు వ్యతిరేకంగా నిరసనలు హోరెత్తుతున్న క్రమంలో నగదు కొరత వేధిస్తోంది. భవిష్యత్ అవసరాల దృష్ట్యా బ్యాంకుల్లో దాచుకున్న సేవింగ్స్ను అక్కడి ప్రజలు అధిక మొత్తంలో విత్డ్రా చేస్తున్నందున ఈ సమస్య తలెత్తుతోంది. ఫలితంగా వస్తు సేవల ధరలు తారస్థాయికి చేరుకుంటున్నాయి.
ఫిబ్రవరి 1న ఆంగ్ సాన్ సూకి నేతృత్వంలోని పౌర ప్రభుత్వాన్ని కూలదోసి.. సైనిక ప్రభుత్వం అధికారాన్ని చేపట్టిన నాటి నుంచి మయన్మార్లో ఆర్థిక సంక్షోభం నెలకొంది. ఈ పరిస్థితులను జుంటా నేతృత్వంలోని సైనిక ప్రభుత్వం ఏమాత్రం పరిష్కరించలేకపోయిందని క్యోడో వార్తా సంస్థ నివేదించింది. దేశంలోని పెద్ద నగరమైన యాంగూన్లో.. ప్రజలు ఉదయం వేళల నుంచే నగదు కోసం బ్యాంకుల ముందు బారులు తీరుతున్న దృశ్యాలు ఇందుకు సాక్ష్యాలుగా కనిపిస్తున్నాయి.
నగదు ఉపసంహరణపై పరిమితులు..
సైనిక పాలనలో ఆ దేశంలోని బ్యాంకులన్నీ అంతంతమాత్రంగానే నడిచాయి. నిరసనల్లో పాల్గొంటున్నందున బ్యాంకు ఉద్యోగులు విధులకు హాజరు కావటం లేదు. అయితే.. ఇప్పుడిప్పుడే క్రమంగా బ్యాంకు కార్యకలాపాలు ప్రారంభమవుతున్నప్పటికీ.. నగదు ఉపసంహరణపై సైనిక ప్రభుత్వం పరిమితులు విధించింది. ఎలాగోలా బ్యాంకుల నుంచి నగదును తెచ్చుకున్నవారు.. బ్లాక్మార్కెట్లో వాటిని అమెరికా డాలర్లుగా మార్చుకుంటారని, తమ ఇళ్లలో దాచుకుంటున్నారని చెప్పింది. నగదు కొరత నేపథ్యంలో.. తమ జవాన్లకు కూడా సైనిక ప్రభుత్వం సకాలంలో జీతాలు చెల్లించలేకపోతోందని పేర్కొంది.
మరోవైపు మయన్మార్లో తలెత్తిన హింసాత్మక ఘటనల్లో ఇప్పటివరకు 800మందికి పైగా మరణించారు. మరో 4,330 మంది జైలు పాలయ్యారు.
ఇదీ చూడండి: 'మయన్మార్కు సివిల్ వార్ ముప్పు!'
