నిరసనల నడుమ ఇరాక్​ ప్రధాని రాజీనామా..!

ఇరాక్​ చట్టసభ్యులు ప్రధానికి మద్దతు ఉపసంహరించుకోవాలని ఆ దేశంలోని షియా మతాధికారి చేసిన ప్రకటన చేసిన అనంతరం.. రాజీనామా చేస్తున్నట్లు ప్రకటించారు ప్రధాని అదెల్​ అబ్దెల్​ మహ్దీ. దీంతో నిరసనకారులు దేశ రాజధాని బాగ్దాద్​లో ఆనందంతో నృత్యాలు చేస్తూ సంబరాలు జరుపుకున్నారు. ఈ విషయంపై స్పందించిన అమెరికా మహ్దీ రాజీనామా ప్రకటనపై సానుభూతి చూపించింది. ప్రజల డిమాండ్లను నెరవేర్చే దిశగా ఇరాక్​ నేతలు చొరవచూపాలని కోరింది.

ఇరాక్​లోని అగ్రశ్రేణి షియా మతాధికారి కోరిక మేరకు రాజీనామా చేస్తున్నట్లు ప్రకటించారు ఆ దేశ ప్రధాని అదెల్​ అబ్దెల్​ మహ్దీ. పార్లమెంట్​ భవనంలో రాజీనామా లేఖను అందజేయటానికి సిద్ధంగా ఉన్నట్లు ప్రకటించారు.

గత రెండు నెలల నుంచి నిరంతరంగా కొనసాగిన ఆందోళనలతో ఇరాక్​ అట్టుడుకుతోంది. ప్రభుత్వ వ్యతిరేక నినాదాలతో దేశ ప్రధాని రాజీనామా, ఇతర డిమాండ్లతో ప్రజలు నిరసన బాట పట్టారు. ఇప్పటిదాకా పోలీసులు నిరసనకారులకు మధ్య జరిగిన ఘర్షణల్లో 400మందికి పైగా ప్రాణాలు కోల్పోయారు. 15 వేల మందికిపైగా గాయపడ్డారు. ఈ నిరసనలు మరింత ఉద్ధృతం కాకుండా ఉండేందుకు.. చట్టసభ్యులు ప్రధానికి మద్దతు ఉపసంహరించుకోవాలని కోరారు షియా మతాధికారి. దీంతో ప్రధాని మహ్దీ రాజీనామా చేసేందుకు సిద్ధంగా ఉన్నట్లు ప్రకటించారు.

సంబరాలు...

దేశ ప్రధాని అదెల్​ అబ్దెల్​ మహ్దీ స్వయంగా రాజీనామా చేస్తున్నట్లు ప్రకటించిన అనంతరం... నిరసనకారుల ఆనందానికి హద్దులు లేకుండా పోయింది. దేశ రాజధాని బాగ్దాద్​ వీధుల్లో నిరసనలు ఆపేసి రోడ్లపై నృత్యాలు చేస్తూ సంబరాలు చేసుకున్నారు.

"ఇది మా మొదటి విజయం, మిగతా డిమాండ్లను మేము నెరవేర్చుకుంటాం. ఈ పోరాటంలో ప్రాణాలు కోల్పోయిన వారి శ్రమ వృథా కాలేదు. వారు గెలిచారు.''

- ఓ నిరసనకారుడు

చర్చలు జరపండి: అమెరికా

ఇరాక్​ ప్రధాని అబ్దెల్​ మహ్దీ రాజీనామా ప్రకటనపై పరోక్షంగా స్పందించింది అమెరికా. అక్కడి ప్రభుత్వ నేతలు.. నిరసనకారుల డిమాండ్లను పరిష్కరించేలా చర్యలు జరపాలని కోరింది.

ఇదీ చూడండి : మలయాళీ కవి అక్కితంను వరించిన జ్ఞాన్​పీఠ్​ అవార్డ్​