పాక్​ సైన్యం కవ్వింపులపై ఐరాస కీలక వ్యాఖ్యలు

పాకిస్థాన్​ కవ్వింపు చర్యలపై ఐక్యరాజ్య సమితి పరోక్షంగా స్పందించింది. కరోనా మహమ్మారి విజృంభిస్తున్న తరుణంలో కాల్పుల విరమణకు ఐరాస ప్రధాన కార్యదర్శి ఆంటోనియో గుటెరస్​ చేసిన విజ్ఞప్తికి.. ప్రపంచ దేశాలు కట్టుబడి ఉండాలని తేల్చిచెప్పింది.

పాకిస్థాన్​ సైన్యం తరచూ కవ్వింపు చర్యలకు పాల్పడుతున్న వేళ కీలక వ్యాఖ్యలు చేశారు ఐరాస ప్రధాన కార్యదర్శి అధికార ప్రతినిధి డుజార్రిక్. కరోనా వైరస్​తో ప్రపంచం గడగడలాడుతున్న తరుణంలో కాల్పుల విరమణ పాటించాలని ఆంటోనియో గుటెరస్ ఇచ్చిన పిలుపునకు అందరూ కట్టుబడి ఉండాలని సూచించారు.

"ప్రపంచవ్యాప్తంగా కాల్పుల విరమణ పాటించాలని ఐరాస ప్రధాన కార్యదర్శి కోరారు. అది అందరికి వర్తిస్తుంది. అందరూ గుటెరిస్​ విజ్ఞప్తికి కట్టుబడి ఉండాలి."

-- డుజార్రిక్​, గుటెరస్​ ప్రతినిధి.

గురువారం జమ్ముకశ్మీర్​ పూంచ్​ జిల్లా వద్ద ఉన్న సరిహద్దు నియంత్రణ రేఖ వెంబడి కాల్పుల విరమరణ ఒప్పందాన్ని ఉల్లంఘించింది పాక్​. ఈ ఘటనలో ఓ భారత పౌరుడు ప్రాణాలు కోల్పోయాడు. పాకిస్థాన్​ చర్యలపై భారత్​ తీవ్ర నిరసన వ్యక్తం చేసింది.

పాకిస్థాన్​ సైన్యం.. మంగళవారం కూడా పూంచ్​ జిల్లాలోని కస్బా, కిర్ని, షాపుర్​, మన్​కోట్​ సెక్టర్లపై దాడి చేసిందని అధికారులు తెలిపారు.

భారత ప్రభుత్వం 2019 ఆగస్టులో జమ్ముకశ్మీర్​కు స్వయం ప్రతిపత్తిని రద్దు చేసింది. అప్పటి నుంచి పాకిస్థాన్​ వైపు నుంచి కాల్పుల ఘటనలు పెరిగాయి.

ఇదీ చూడండి:- పాక్​ కవ్వింపు చర్యలు.. ఇద్దరు భారత జవాన్లు మృతి