దశాబ్దాలుగా యుద్ధంతో అతలాకుతలమైన అఫ్గానిస్థాన్లో శాంతిని నెలకొల్పే ఉద్దేశంతో అమెరికా, తాలిబన్ల మధ్య చారిత్రాత్మక ఒప్పందం కుదిరింది. ఖతార్లోని దోహాలో జరిగిన కార్యక్రమంలో ఇరు పక్షాల ప్రతినిధులు సంతకాలు చేశారు. భారత్ సహా ప్రపంచ దేశాలు, అంతర్జాతీయ సంస్థలు ఈ ఒప్పందాన్ని స్వాగతించాయి.
ఎవరెవరు ఏమన్నారంటే..
ఉగ్రవాదాన్ని, హింసను అంతమొందించి శాంతి-సుస్థిరతలను అఫ్గానిస్థాన్లో నెలకొల్పే అవకాశాలన్నింటికీ మద్దతు ఇవ్వాలనేదే తమ విధానమని స్పష్టం చేసింది భారత్. ఈ మేరకు ఒప్పందాన్ని స్వాగతించారు భారత విదేశాంగ శాఖ అధికార ప్రతినిధి రవీశ్ కుమార్.
అమెరికా-తాలిబన్ల శాంతి ఒప్పందంతో భారతదేశ భద్రత, ఇతరత్రా ప్రయోజనాలపై ఎలాంటి ప్రతికూల ప్రభావం పడకుండా చూడాలని కోరింది కాంగ్రెస్ పార్టీ.
ఈ అవకాశం వదులుకోవద్దు: ఈయూ
శాంతి ప్రక్రియలో అమెరికా-తాలిబన్ ఒప్పందం తొలి అడుగని పేర్కొంది ఐరోపా సమాఖ్య(ఈయూ). శాంతి నెలకొల్పే దిశగా వచ్చిన ఈ గొప్ప అవకాశాన్ని వదులుకోవద్దని ఓ ప్రకటనలో తెలిపారు ఈయూ విదేశాంగ విభాగ చీఫ్ జోసెఫ్ బోరెల్.
ఒప్పందం ఆహ్వానించదగినది: పాక్
శాంతి ఒప్పందాన్ని స్వాగతించిన దాయాది పాకిస్థాన్.. అఫ్గాన్లో శాంతి కోసం జరిగే ప్రయత్నాలన్నింటికీ మద్దతు కొనసాగిస్తామని తెలిపింది. అఫ్గాన్కే కాకుండా ప్రాంతీయంగా ఈ ఒప్పందం ఎంతో విలువైందని ఆ దేశ విదేశాంగ శాఖ పేర్కొంది. శాంతియుత అఫ్గాన్ కోసం పాక్ తన వంతు బాధ్యత నిర్వర్తించిందని స్పష్టం చేసింది.
సుస్థిర శాంతికి తొలి అడుగు: నాటో
సుస్థిర శాంతి దిశగా ఈ ఒప్పందం చాలా ముఖ్యమైన తొలి అడుగు అని నాటో కూటమి ప్రధాన కార్యదర్శి జెన్స్ స్టోలెన్బర్గ్ చెప్పారు. ఒప్పందానికి గౌరవ సూచికంగా శనివారం అన్నిరకాల దాడులను నిలిపివేశామని తాలిబన్లు అంతకుముందు తెలిపారు.
ఆహ్వానించిన ఐరాస
శాంతి ఒప్పందాన్ని ఐక్యరాజ్యసమితి ఆహ్వానించింది. హింస తగ్గి, అఫ్గాన్ ప్రజలందరూ ఈ ఒప్పందంతో లబ్ధి పొందుతారని ఐరాస సెక్రటరీ జనరల్ ఆంటోనియో గుటెరస్ పేర్కొన్నారు.
అఫ్గాన్ ప్రజల మిశ్రమ స్పందన
చరిత్రాత్మక ఒప్పందంపై అఫ్గాన్ ప్రజలు మిశ్రమ స్పందన వ్యక్తం చేస్తున్నారు. కొన్నేళ్లుగా తీవ్రస్థాయిలో రక్తపాతాన్ని చూసిన తాము ఇకపై ఇంకేం చూడాల్సి వస్తుందోనని ఆందోళన చెందుతున్నారు. తాలిబన్లు తిరిగి అధికారంలోకి వచ్చేందుకు ప్రస్తుత పరిణామాలు ఉపయోగపడేలా ఉన్నాయని జహ్రా హుస్సేనీ అనే ఓ ఉద్యమకారిణి చెప్పారు. కొన్ని ప్రాంతాల్లో మాత్రం ప్రజలు ఆనందోత్సాహాలతో కనిపించారు.
