2016 అమెరికా అధ్యక్ష ఎన్నికల్లో డొనాల్డ్ ట్రంప్ అనూహ్య విజయం సాధించడంలో రష్యా ప్రమేయం ఉందన్నది చాలా కాలంగా వినిపిస్తున్న మాట. ఈ విషయంపై అగ్రరాజ్యంలో రాజకీయంగా పెను దుమారం రేగింది. తమ అధ్యక్ష ఎన్నికల్లో రష్యా జోక్యాన్ని సహించబోమని ట్రంప్ పలుమార్లు స్పష్టం చేశారు. అయితే ఈ విషయంపై సెంట్రల్ ఇంటిలిజెన్స్ ఏజెన్సీకి చెందిన రష్యా గూఢచారి పలు విషయాలు తెలియజేసినట్లు వస్తున్న కథనాలు సంచలనం రేపుతున్నాయి.
అమెరికా అధ్యక్ష ఎన్నికల్లో రష్యా జోక్యంపై ఆ దేశ అధ్యక్షుడు వ్లాదిమిర్ పుతిన్ స్వయంగా ఆదేశాలు జారీ చేశారని ఆ గూఢచారి తెలియజేశాడన్నది కథనం సారాంశం. అత్యంత సున్నితమైనది కావడం వల్ల అప్పటి సీఐఏ డైరక్టర్ జాన్ ఒ. బ్రెన్నాన్ ఈ సమాచారాన్ని బయటకి రాకుండా గోప్యంగా ఉంచారట. ఈ సమాచారాన్ని పూర్తిగా సమీక్షించాల్సిందింగా సీఐఏ అధికారులను ఆదేశించారట. ఇది కచ్చితమైన సమాచారమా కాదా అన్న విషయంపై పూర్తి దర్యాప్తు జరిగినట్లు న్యూయార్క్ టైమ్స్ కథనంలో పేర్కొంది.
అమెరికా అధ్యక్ష ఎన్నికల్లో రష్యా ప్రమేయంపై అనుమానాలు ఉన్నట్లు 2016లో ఇంటిలిజెన్స్ అధికారులు తెలియజేశారు. మీడియాలో ఈ విషయంపై పలు కథనాలు రావడం వల్ల.. ఇంటిలిజెన్స్ అధికారులు ఆ గుఢచారిని రష్యా నుంచి తప్పించారట.
అయితే గుఢచారిని తప్పించిన అనంతరం.. 2018 అమెరికా మధ్యంతర ఎన్నికలు, 2020 అధ్యక్ష ఎన్నికలల్లో రష్యా ప్రమేయంపై ఆధారాలు సేకరించేందుకు సీఐఏ అధికారులు ప్రయత్నిస్తున్నారని ఈ కథనం పేర్కొంది.
సీఎన్ఎన్ నివేదిక ప్రకారం.. సున్నిత సమాచారాన్ని ట్రంప్ ప్రభుత్వం దుర్వినియోగం చేసే అవకాశమున్నందునే ఆ గూఢచారిని తప్పించారు. అయితే దీనికి కచ్చితమైన ఆధారాలు లేవని మాజీ ఇంటిలిజెన్స్ అధికారులు పేర్కొన్నారు.
- ఇదీ చూడండి: భారత్-పాక్ మధ్య ఉద్రిక్తతలు తగ్గాయి: ట్రంప్
