సరిహద్దుల్లో ఉద్రిక్తతలను తగ్గించేందుకు తొమ్మిదో విడత కమాండర్ స్థాయి చర్చలు జరపడానికి భారత్-చైనాలు సమాలోచనలు చేస్తున్నాయి. వాస్తవాధీన రేఖ వెంబడి బలగాల ఉపసంహరణపై మరోసారి చర్చించడానికి ఇరుదేశాల మధ్య సంప్రదింపులు జరుగుతున్నాయని చైనా రక్షణ శాఖ ప్రతినిధి కల్నల్ టాన్ కేఫీ. సైనికాధికారులు, దౌత్య మార్గాలు ద్వారా భారత్తో చర్చలు జరపడానికి చైనా సుముఖంగా ఉన్నట్లు టాన్ పేర్కొన్నారు.
ఏకాభిప్రాయాన్ని అమలు చేయాలి
ఒకే లక్ష్యం కోసం భారత్.. చైనాతో కలిసి పనిచేస్తుందన్న టాన్.. కార్ప్స్ కమాండర్ స్థాయి సమావేశాల్లో కుదిరిన ఏకాభిప్రాయాన్ని అమలు చేయాలన్నారు. సరిహద్దు ప్రాంతాల్లో ఉద్రిక్తతను మరింత తగ్గించడానికి ఆచరణాత్మక చర్యలు తీసుకోవాలన్నారు.
సరిహద్దుల్లో ప్రతిష్టంభనపై ఇరు దేశాల మధ్య పలుమార్లు చర్చలు జరిగినప్పటికీ ఎలాంటి ఫలితం లేకపోయింది. అయితే ఈ నెల 18న విదేశాంగ అధికారుల స్థాయిలో జరిగిన చర్చల్లో బలగాల ఉపసంహరణకు ఇరుదేశాలు అంగీకరించాయి. అలాగే మరోమారు చర్చలు జరపాలని కూడా నిర్ణయం తీసుకున్నాయి.
ఇదీ చూడండి: పాక్కు 11 లక్షల చైనా టీకా డోసులు!
