చైనాను నియంత్రించాలని ఇటీవల జరిగిన జీ7 దేశాల శిఖరాగ్ర సదస్సులో అమెరికా పిలుపునిచ్చిన నేపథ్యంలో... ఆ దేశాలను ఎదుర్కొనేందుకు చైనా సన్నద్ధమవుతోంది. 'వోల్ఫ్ వారియర్'గా పిలిచే దుందుడుకు దౌత్య విధానాన్ని ఇకపై అనుసరించాలని యోచిస్తున్నట్లు తెలుస్తోంది. తద్వారా తమపై ఆంక్షలను విధించకుండా విదేశాలను అడ్డుకోవాలని భావిస్తోంది.
సదస్సుకు ముందే ఆ చట్టం...
రెండేళ్లుగా జిన్పింగ్ తమ దౌత్యవేత్తలను పోరాట పంథాను అలవర్చుకోవాలని ఆదేశిస్తున్నారని జియాన్లీ యాంగ్ అనే విశ్లేషకుడు 'న్యూస్వీక్' అనే పత్రికకు రాసిన వ్యాసంలో పేర్కొన్నారు. అమెరికా-చైనా సంబంధాలు సహా అంతర్జాతీయ సవాళ్లను ఎదుర్కోవటంలో కఠిన వైఖరిని అవలంబించాలని సూచిస్తున్నట్లు తెలిపారు. ఈ వాదనలకు బలం చేకూర్చేలా.. ఇంగ్లాండ్లో 47వ జీ7 సదస్సు ప్రారంభానికి ముందే.. ఓ కొత్త చట్టాన్ని చైనా పార్లమెంటు ఆమోదించింది. షింజియాంగ్లో బలవంతపు కార్మిక విధానాలు, హాంకాంగ్లో మానవ హక్కుల ఉల్లంఘనకు చైనా పాల్పడుతోందంటూ అంతర్జాతీయ సమాజం ఆందోళన వ్యక్తం చేస్తున్న నేపథ్యంలో... చైనాకు చెందిన పలు సంస్థలపై యూరోపియన్ యూనియన్ దేశాలు ఆంక్షలను విధించాయి. ఈ క్రమంలో వాటిని ఎదుర్కొనేందుకు ఈ చట్టాన్ని చైనా తీసుకువచ్చినట్లు తెలుస్తోంది.
మార్పులు చేస్తారా?
మే 31న జరిగిన చైనా కమ్యూనిస్టు పార్టీ(సీసీపీ) సమావేశంలో.. అంతర్జాతీయంగా తమ గొంతుకను బలంగా వినిపించేలా అధికారులకు జిన్పింగ్ సూచించారు. అయితే అదే సమయంలో.. వినయం కూడా ప్రతిబింబించాలని తెలిపారు. జిన్పింగ్ మాటల ద్వారా.. 'వోల్ఫ్ వారియర్' దౌత్య విధానానంలో జిన్పింగ్ కొన్ని మార్పులు చేయాలనుకుంటున్నట్లు విశ్లేషకులు భావిస్తున్నారని జియాన్లీ తన వ్యాసంలో పేర్కొన్నారు. జిన్పింగ్ ఈ మార్పులు చేయటంలో విఫలమైతే.. చైనాపై విదేశాల్లో వ్యతిరేకత ఇంకా పెరుగుతుందని చెప్పారు.
చైనా తీసుకువచ్చిన తాజా చట్టంతో.. అమెరికాలోని బహుళ జాతి సంస్థలకు నష్టమే అయినప్పటికీ.. అది మరింత వైరానికి దారి తీయవచ్చని 'న్యూస్ వీక్' తెలిపింది. చైనాతో పోరుకు అమెరికాను మరింత రెచ్చగొట్టవచ్చని పేర్కొంది. జీ7 శిఖరాగ్ర సదస్సుకు ముందు హడావుడిగా ఈ చట్టాన్ని తీసుకువచ్చిన చైనా ప్రభుత్వం చర్యలు.. అమెరికాతో కయ్యానికి కాలు దువ్వుతున్నట్లు కనపిస్తోందని తెలిపింది.
ఇవీ చూడండి:
