తాలిబన్ల చెర(Afghan Taliban) నుంచి బయటపడేందుకు కాబుల్ విమానాశ్రయానికి(Kabul airport) భారీగా ప్రజలు తరలివస్తున్న వేళ.. ఎయిర్పోర్ట్ ప్రాంతంలో భారీ ఉగ్రదాడికి కుట్ర(Terror Attack) జరుగుతోందా? అంటే అవుననే అంటున్నాయి వేర్వేరు దేశాలు. కాబుల్ విమానాశ్రయం సమీపంలో ఆత్మాహుతి దాడి జరిగే ప్రమాదం ఉందని హెచ్చరించింది బ్రిటన్ ప్రభుత్వం. అక్కడి నుంచి దూరంగా వెళ్లిపోవాలని సూచించింది. హెచ్చరికలను బేఖాతరు చేస్తూ వేలాది మంది ఎయిర్పోర్ట్కు తరలివస్తుండటంపై ఆందోళన వ్యక్తం చేసింది.
తమ పౌరులు కాబుల్ విమానాశ్రయం నుంచి దూరంగా వెళ్లిపోవాలని.. బ్రిటన్తో పాటు అమెరికా, ఆస్ట్రేలియా దేశాలు హెచ్చరికలు జారీ చేశాయి. ఇస్లామిక్ స్టేట్ గ్రూప్తో సంబంధాలున్న ఉగ్రవాదులు దాడులకు పాల్పడే అవకాశం ఉందని అమెరికా అధ్యక్షుడు జో బైడెన్ హెచ్చరికలు చేసిన తర్వాత.. పలు దేశాలు తమ పౌరులను అప్రమత్తం చేస్తున్నాయి.
విమానాశ్రయం వద్ద భారీ దాడికి కుట్ర జరుగుతోందని విశ్వసనీయవర్గాల నుంచి సమాచారం అందినట్లు బ్రిటీష్ రక్షణ మంత్రి జేమ్స్ హీపీ ఓ వార్తా సంస్థకు తెలిపారు.
ఉగ్రదాడిపై ఆస్ట్రేలియా హెచ్చరిక..
కాబుల్ ఎయిర్పోర్ట్ వద్ద భారీ ఉగ్రదాడి జరిగే అవకాశం ఉందని తమ పౌరులను హెచ్చరించింది ఆస్ట్రేలియా. విమానాశ్రయం ప్రాంతంలో ఉన్న తమ పౌరులు సురక్షిత ప్రాంతానికి వెళ్లాలని, తదుపరి ఆదేశాలు ఇచ్చేవరకు అక్కడే ఉండాలని సూచించింది. బ్రిటన్, న్యూజిలాండ్ ప్రకటనతో ఈ నిర్ణయం తీసుకున్నట్లు ఆస్ట్రేలియా విదేశాంగ మంత్రి మారైస్ పేనీ తెలిపారు. గత వారం నుంచి ఇప్పటి వరకు మొత్తం 4వేల మందిని కాబుల్ నుంచి తరలించినట్లు చెప్పారు.
తరలింపు నిలిపేసిన ఫ్రాన్..
కాబుల్ విమానాశ్రయం నుంచి ప్రజల తరలింపు ప్రక్రియను శుక్రవారం రాత్రి నుంచి నిలిపివేస్తున్నట్లు ప్రకటించారు ఫ్రాన్స్ ప్రధానమంత్రి జీన్ కాస్టెక్స్. అమెరికా బలగాల ఉపసంహరణకు ఆగస్టు 31 గడువు నేపథ్యంలోనే ఈ నిర్ణయం తీసుకున్నట్లు చెప్పారు. ఇప్పటి వరకు 2వేల మంది అఫ్గాన్ పౌరులు, వందల మంది ఫ్రాన్స్ ప్రజలను తరలించినట్లు తెలిపారు.
ఇదీ చూడండి: Afghan Crisis: అఫ్గాన్లో తాలిబన్లను మించిన ఆహార సంక్షోభం!
