అఫ్గానిస్థాన్ నుంచి తమ ప్రజలను స్వదేశానికి తరలించేందుకు వెళ్లిన ఉక్రెయిన్ విమానం హైజాక్కు గురైందని(Ukraine News) రష్యా వార్తా సంస్థ టాస్ వెల్లడించింది. అయితే ఈ పని ఎవరు చేశారనే విషయంపై మాత్రం స్పష్టత ఇవ్వలేదు. హైజాకర్లు ఈ విమానాన్ని ఇరాన్కు దారిమళ్లించినట్లు ఉక్రెయిన్ విదేశాంగ సహాయమంత్రి తెలిపారని టాస్ పేర్కొంది.
"ఆదివారం మా విమానాన్ని దుండగులు హైజాక్ చేశారు(Ukraine Plane Hijack). మంగళవారం ఆ విమానాన్ని దొంగిలించారు. ఉక్రెయిన్ ప్రజలకు బదులు గుర్తు తెలియని ప్రయాణికులతో ఆ విమానాన్ని దుండగులు ఇరాన్ తీసుకెళ్లారు. ఆ తర్వాత మా ప్రజలను తీసుకొచ్చేందుకు మేము చేసిన మూడు ప్రయత్నాలు విఫలమయ్యాయి. మా ప్రజలు కాబుల్ విమానాశ్రయానికి చేరుకోలేకపోయారు. " అని ఉక్రెయిన్ సహాయ మంత్రి యెవ్గెనీ యెనిన్ వివరించారని టాస్ పేర్కొంది. హైజాకర్ల వద్ధ ఆయుధాలు ఉన్నాయని ఆయన చెప్పారని .. మిగతా విషయాలు మాత్రం వెల్లడించలేదని తెలిపింది.
కాబుల్కు(Kabul Airport) ఉక్రెయిన్ పంపిన మరో మిలిటరీ విమానం మాత్రం ఆదివారం సురక్షితంగా తిరిగివెళ్లింది. అందులో 83 మంది ప్రయాణికులుండగా.. వారిలో 31మంది ఉక్రెయిన్ పౌరులు. అఫ్గాన్ నుంచి ఇంకా 100 మందిని తరలించాల్సి ఉందని ఉక్రెయిన్ అధికారులు పేర్కొన్నట్లు టాస్ తెలిపింది.
అసత్యం..
అయితే విమానం హైజాక్(Ukraine Plane) వార్తలను ఉక్రెయిన్, ఇరాన్ ఖండించినట్లు జెరుసలెం పోస్ట్ వార్తా సంస్థ వెల్లడించింది. విమానం మషద్లో ఇంధనం కోసం మాత్రమే ఆగిందని, ఆ తర్వాత ఉక్రెయిన్ రాజధాని కీవ్కు వెళ్లిపోయిందని ఇరాన్ పౌరవిమానయాన శాఖ స్పష్టం చేసినట్లు పేర్కొంది.
మరోవైపు విమానం హైజాక్ వార్తలు పూర్తిగా అవాస్తవమని ఉక్రెయిన్ మీడియా తెలిపింది. కాబుల్లో గానీ మరెక్కడా గానీ విమానం హైజాక్ కాలేదని విదేశాంగ శాఖ అధికార ప్రతినిధి ఒలెగ్ నికెలెంకో చెప్పినట్లు పేర్కొంది. తమ పౌరులను తరలించే క్రమంలో ఎన్ని ఇబ్బందులు ఎదురవుతున్నాయో చేప్పేందుకే విదేశాంగ మంత్రి ప్రయత్నించినట్లు ఒలెగ్ వివరించారని చెప్పింది.
