ట్విట్టర్ తన ఖాతాను శాశ్వతంగా నిషేధించడాన్ని అమెరికా అధ్యక్షుడు డొనాల్డ్ ట్రంప్ తప్పుబట్టారు. తనతో పాటు తనకు ఓటేసిన 7.5 కోట్ల మంది గళాన్ని నొక్కేందుకు ట్విట్టర్ ప్రయత్నిస్తుందన్నారు. అయితే ఈ విషయంపై తాము మౌనంగా ఉండబోమని ట్రంప్ అన్నారు. సొంతంగా ఓ సామాజిక మాధ్యమాన్ని రుపొందించేందుకు ప్రయత్నాలు చేస్తున్నట్లు చెప్పారు.
తన వ్యక్తిగత ఖాతాను నిషేధించడం వల్ల అధ్యక్షుడి అధికారిక ట్విట్టర్ (ప్రెసిడెంట్‌ ట్రంప్) ద్వారా ట్రంప్ ఈ మేరకు స్పందించారు.
"ట్విట్టర్ వాక్‌ స్వాతంత్య్రాన్ని హరిస్తోంది. డెమొక్రాట్లు, ర్యాడికల్‌ లెఫ్ట్‌తో ట్విట్టర్ ఉద్యోగులు కుమ్మక్కయ్యారు. ట్విట్టర్ ఓ ప్రైవేట్‌ కంపెనీ.. ప్రభుత్వం దాఖలు పరిచే సెక్షన్‌ 230 లేకుంటే వారు ఎక్కువకాలం మనుగడ సాగించలేరు.
త్వరలో ఓ భారీ ప్రకటన ఉండే అవకాశం ఉంది. సొంతంగా ఓ సామాజిక మాధ్యమాన్ని రూపొందించడానికి ఉన్న సాధ్యాసాధ్యాలను కూడా పరిశీలిస్తున్నాం. ఇతర వెబ్‌సైట్లతో మాట్లాడుతున్నాం. తమ గళాన్ని ఎవరూ నొక్కేయలేరు. "
- డొనాల్డ్ ట్రంప్, అమెరికా అధ్యక్షుడు
ఈ ట్వీట్లను కూడా ట్విట్టర్ వెంటనే తొలగించడం గమనార్హం. 'ప్రెసిడెంట్‌ ట్రంప్' ప్రభుత్వ ట్విట్టర్ ఖాతా కావడం వల్ల నిషేధం విధించలేకపోయింది.
శాశ్వత నిషేధం..
ట్రంప్ తన సందేశాల ద్వారా మరింత హింసను ప్రోత్సహించే ప్రమాదముందనే కారణంతో ట్విట్టర్ ఆయన వ్యక్తిగత ఖాతాపై శాశ్వత నిషేధం విధించింది. ఇటీవల ఆయన చేసిన ట్వీట్లను పరిశీలించిన తర్వాతే ఈ నిర్ణయం తీసుకున్నట్లు వెల్లడించింది.
