సామాజిక మాధ్యమాలైన ట్విట్టర్, ఫేస్బుక్ వంటి సంస్థలే లక్ష్యంగా తెచ్చిన కార్యనిర్వాహక ఉత్తర్వులపై అమెరికా అధ్యక్షుడు డొనాల్డ్ ట్రంప్ సంతకం చేశారు. తాను చేసిన పోస్టులకు ట్విట్టర్ ఫ్యాక్ట్ చెక్ వార్నింగ్ పంపిన ఒక రోజు వ్యవధిలోనే ఈ నిర్ణయం తీసుకున్నారు ట్రంప్. ఎన్నికల విషయంలో సామాజిక మాధ్యమాలు తటస్థంగా ఉండకుండా.. జోక్యం చేసుకుంటున్నాయని ట్రంప్ ఆరోపించారు.
" అమెరికన్ల వాక్ స్వాతంత్య్రం, హక్కులను రక్షించేందుకు ఈ రోజు ఎగ్జిక్యూటివ్ ఆర్డర్పై సంతకం చేశాను."
- డొనాల్డ్ ట్రంప్, అమెరికా అధ్యక్షుడు
తాజా ఉత్తర్వులతో సమాచార సభ్యత చట్టంలోని సెక్షన్ 230 ప్రకారం.. సామాజిక మాధ్యమాలపై సరికొత్త నిబంధనలు విధించనున్నారు ట్రంప్. ఈ మేరకు దేశంలోని అన్ని రాష్ట్రాల అధికారులు అటార్నీ జనరల్తో కలిసి పనిచేయాలని స్పష్టం చేశారు.
తన ట్వీట్లకు ఫ్యాక్ట్ చెక్ వార్నింగ్ పంపడంపై ట్రంప్ తీవ్రస్థాయిలో మండిపడ్డారు. సామాజిక మాధ్యమ సంస్థలపై కొత్త నియంత్రణలు విధిస్తామని, అవసరమైతే మూసేయడానికీ వెనుకాడబోమని గురువారమే హెచ్చరించారు.
