ఉత్తర కొరియా అధినేత కిమ్ జోంగ్ ఉన్ దాదాపు 3 వారాల తర్వాత బయట కనిపించడం పట్ల సంతోషం వ్యక్తం చేశారు అమెరికా అధ్యక్షుడు డొనాల్డ్ ట్రంప్. ఈ మేరకు ట్వీట్ చేశారు. కిమ్ తిరిగిరావడం ఆనందంగా ఉందన్నారు.
'' కిమ్ తిరిగి రావడం, ఆయన ఆరోగ్యంగా ఉండడం పట్ల చాలా సంతోషంగా ఉంది.''
- డొనాల్డ్ ట్రంప్, అమెరికా అధ్యక్షుడు
20 రోజులుగా బయటి ప్రపంచానికి కనిపించకుండా ఉన్నారు కిమ్ జోంగ్ ఉన్. ఆయన ఆరోగ్యం క్షీణించిందని ఎన్నో వదంతులు వచ్చాయి. వాటికి తెరదించుతూ.. ఓ ఎరువుల కర్మాగారం ప్రారంభోత్సవానికి శనివారం విచ్చేశారు కిమ్. సంబంధిత వీడియోను ఉత్తర కొరియా అధికారిక న్యూస్ ఏజెన్సీ విడుదల చేసింది.
సామాజిక మాధ్యమాల్లో ఒకరు పంచుకున్న వీడియోను.. ట్విట్టర్లో ట్యాగ్ చేసిన ట్రంప్ పైవ్యాఖ్యలు చేశారు. అంతకుముందు కూడా కిమ్ గురించి తనకు సమాచారం ఉందని, కానీ చెప్పనని అంటూ వచ్చారు ట్రంప్.
ఇదీ చూడండి: కొరియా నేతలకు 'అదృశ్యం' కొత్తేం కాదు!
