సాధారణంగా శీతల దేశాల్లో.. ముఖ్యంగా చలి కాలంలో కొందరిలో కాలి వేళ్లు వాచి ఎర్రగా మారి నొప్పిపెడుతుంటాయి. ఇప్పుడు అమెరికా, స్పెయిన్, బెల్జియం, ఇటలీ తదితర దేశాల్లో అనేక మంది ముఖ్యంగా చిన్నపిల్లలు, యువకులు ఈ సమస్యతో ఆసుపత్రుల చుట్టూ తిరుగుతున్నారు. ఆయా ప్రాంతాల్లో ఇప్పుడు తీవ్ర చలికాలం కాదు. అలానే ఆయా వ్యక్తుల్లో ఎక్కువమంది గతంలో ఈ సమస్య బారిన పడలేదు. అయినా ఎందుకీ సమస్య పెరుగుతుందనేది వైద్యులకు అంతుపట్టడంలేదు.
ప్రస్తుతం కరోనా మహమ్మారి విజృంభిస్తున్న నేపథ్యంలో.. ఇలాంటివారికి కొవిడ్‌-19 నిర్ధారణ పరీక్షలు చేయాల్సిన అవసరం ఉందని వైద్యులు సూచిస్తున్నారు.
"వారిలో ఎలాంటి కరోనా లక్షణాలూ కనిపించడంలేదు. కానీ అకస్మాత్తుగా ఈ కేసులు పెరిగిపోతుండడం వల్ల ఇవి కరోనాకు సంకేతాలా అనే కోణంలో ఆలోచన చేయాల్సిన అవసరం ఉంది"
- చర్మవ్యాధుల నిపుణులు
అయితే.. కంగారు పడాల్సిన అవసరం లేదని, ఆయా వ్యక్తులు కరోనా బారిన పడి, రోగనిరోధక శక్తి కారణంగా దాని నుంచి కోలుకున్నారనడానికి ఇది సంకేతమని కాలిఫోర్నియా విశ్వవిద్యాలయానికి చెందిన డాక్టర్‌ ఫాక్స్‌ చెబుతున్నారు.
